ప్ర‌భాస్ – రాధాకృష్ణ కాంబినేష‌న్‌లో ఓ సినిమా రూపుదిద్దుకుంటున్న సంగ‌తి తెలిసిందే. పూజా హెగ్డే క‌థానాయిక‌గా న‌టిస్తోంది. ఈ సినిమాకోసం హైద‌రాబాద్‌లో ఏకంగా 18 సెట్లు వేయ‌బోతున్నారు. ఓ సినిమా కోసం ఇన్ని సెట్లు వేయ‌డం ఈ మ‌ధ్య కాలంలో ఇదే తొలిసారి. ప్రొడ‌క్ష‌న్ డిజైన‌ర్ ఎస్‌.ర‌వీంద‌ర్ రెడ్డి ఆధ్వ‌ర్యంలో ఈ సెట్స్ రూపుదిద్దుకుంటున్నాయి. ఇది రోమ్ నేప‌థ్యంలో జ‌రిగే క‌థ‌. అక్క‌డ కొంత భాగం తెర‌కెక్కించారు. వాటికి మ్యాచింగ్‌గా ఇండోర్ సీన్ల‌ని హైద‌రాబాద్‌లోనే తెర‌కెక్కిస్తున్నారు. ఇందుకోసం 18 సెట్లు అవ‌స‌ర‌మ‌య్యాయ‌ని స‌మాచారం. వీటి బ‌డ్జెట్ దాదాపు 60 నుంచి 70 కోట్ల వ‌ర‌కూ ఉంటుంద‌ని టాక్‌. అన్న‌పూర్ణ స్టూడియోస్‌లో ఇప్ప‌టికే మూడు సెట్ల‌ని రూపొందించారు. క‌థానాయిక ఇంటి నేప‌థ్యంలో స‌న్నివేశాల కోసం రూ.4 కోట్ల విలువైన ఓ సెట్ ని వేశారు. మిగిలిన సెట్స్‌కీ.. భారీగానే ఖ‌ర్చు పెడ‌తార‌ని తెలుస్తోంది. త్వ‌ర‌లోనే ఇట‌లీ వెళ్ల‌బోతోంది చిత్ర‌బృందం. అక్క‌డ మ‌రో నెల రోజుల పాటు కీల‌క షెడ్యూల్ పూర్తి చేసుకుని వ‌స్తారు. మొత్తానికి ప్ర‌భాస్ సినిమా షూటింగ్ ఫుల్ స్వింగ్‌లో జ‌రుగుతోంద‌న్న‌మాట‌.