స్టార్ హీరో ఆడియో ఫంక్ష‌న్ అంటే అభిమానులు చేసే గోల అంతా ఇంతా కాదు. వేదిక‌పై త‌మ హీరో రావాల‌ని, ఆయ‌నే మాట్లాడాల‌ని ప‌ట్టుబ‌ట్టి కూర్చుంటారు. కేక‌లు వుస్తుంటారు. సాధార‌ణంగా ఇలాంటి సిత్రాలు ప‌వ‌న్ క‌ల్యాణ్ ఆడియో ఫంక్ష‌న్లో క‌నిపిస్తుంటాయి. `భ‌ర‌త్ అనే నేను` లో కూడా ఈ దృశ్యం ఆవిష్కృత‌మైంది. ఈ కార్య‌క్ర‌మానికి మ‌హేష్ తో పాటు, ఎన్టీఆర్ అభిమానులు కూడా భారీ సంఖ్య‌లో హాజ‌ర‌వ్వ‌డంతో ఆ కేరింత‌లు మ‌రింత ఎక్కువ‌య్యాయి. ప్ర‌కాష్‌రాజ్ వేదికపై మాట్లాడుతున్న‌ప్పుడు అభిమానుంతా `పాద‌ర్‌.. ఫాద‌ర్‌` అంటూ అరిచారు. `ఏంట్రా మీ గోల‌` అంటూ కాసేపు స‌ర‌దాగానే తీసుకున్న ప్ర‌కాష్ రాజ్‌కి ఆ త‌ర‌వాత ప‌రిస్థితి అర్థ‌మైంది. ఇక త‌న‌ని మాట్లాడ‌నివ్వ‌ర‌ని తెలుసుకుని, వేదిక నుంచి.. వ‌డివిడిగా కింద‌కు వ‌చ్చేశారు. యాంక‌ర్ సుమ వారిస్తున్నా వినిపించుకోకుండా ప్ర‌కాష్ రాజ్ కింద‌కు వ‌చ్చేసి, అట్నుంచి అటే బ‌య‌ట‌కు వెళ్లి పోయారు. ఈ త‌తంగం అంతా మ‌హేష్‌, ఎన్టీఆర్‌లు ఆశ్చ‌ర్యంగా చూస్తూనే ఉన్నారు. ఇలాంటి బ‌హిరంగ స‌భ‌ల్లో, ఇంత మంది జ‌న సందోహం వ‌చ్చిన‌ప్పుడు ఇలాంటివి మామూలే. ప్ర‌కాష్ రాజే లైట్ తీసుకుని ఉంటే బాగుండేది.