కర్ణాటక ఎన్నికల్లో ఎట్టి పరిస్థితుల్లోనూ గెలవాలనుకుంటున్న భారతీయ జనతా పార్టీ గవర్నర్‌ వ్యవస్థతో ఆడుకుంటోంది. యడ్యూరప్పకు ఆహ్వానం విషయంలోనే తీవ్ర విమర్శలు ఎదుర్కొంటున్న గవర్నర్ కొత్తగా ప్రొటెం స్పీకర్ విషయంలోనూ అలాంటి వివాదాస్పద నిర్ణయమే తీసుకున్నారు. బీజేపీ ఎమ్మెల్యే కే.జి.బోపయ్యను ప్రొటెం స్పీకర్ గా నియమిస్తూ… రాజ్ భవన్ ఆదేశాలు జారీ చేసింది. సుప్రీంకోర్టు ప్రొటెం స్పీకర్ ఆధ్వర్యంలోనే బలపరీక్ష నిర్వహించాలని ఆదేశించింది. వాస్తవానికి కాంగ్రెస్ కు ఆర్వీ దేశ్ పాండేను ప్రొటెం స్పీకర్ గా సిఫార్సు చేస్తూ.. గవర్నర్ కు అసెంబ్లీ సెక్రటేరియట్ సమాచారం పంపింది. సభా సంప్రదాయాల ప్రకారం…ఎన్నికయిన సభ్యుల్లో అత్యంత సీనియర్‌ను ప్రొటెం స్పీకర్ గా గవర్నర్ నియమిస్తారు. ఇప్పటి వరకూ ఇదే సంప్రదయాన్ని పాటించారు. కానీ కర్ణాటక గవర్నర్ మాత్రం దీన్ని ఉల్లంఘించారు. అసెంబ్లీ సెక్రటేరియట్ ఇచ్చిన సూచలను కూడా బుట్టదాఖలు చేసి… తన సొంత నిర్ణయం తీసుకన్నారు. బీజేపీకి చెందిన కేజీ బోపయ్యను ప్రొటెం స్పీకర్ గా నియమిస్తూ ఉత్తర్వులు జారీ చేశారు. ఈ బోపయ్య కేవలం మూడు సార్లు మాత్రమే ఎమ్మెల్యేగా ఎన్నికయ్యారు. కానీ కాంగ్రెస్ ఎమ్మెల్యే ఆర్.వి.దేశ్ పాండే ఎనిమిది సార్లు అసెంబ్లీకి ఎన్నికయ్యారు. బోపయ్య గతంలో బీజేపీ ప్రభుత్వంలో స్పీకర్ గా పని చేశారు.

ఇప్పుడు బలపరీక్షలో బీజేపీకి స్పీకర్ కీలకం కావడంతో.. ప్రొటెం స్పీకర్ గా బీజేపీ ఎమ్మెల్యేను నియమించేందుకు గవర్నర్ అధికారాన్ని మరోసారి దుర్వినియోగం చేశారన్న ఆరోపణలు వెల్లువెత్తుతున్నాయి. ప్రొటెం స్పీకర్ కు కూడా.. సాధారణ స్పీకర్ కు ఉండే అన్ని అధికారాలు ఉంటాయి. సభలో ఎవరైనా ఫిరాయింపులకు పాల్పడితే… అప్పటికప్పుడే వారి ఓటును రద్దు చేసే అధికారం కూడా స్పీకర్‌కు ఉంటుంది. కాంగ్రెస్ ఎమ్మెల్యే స్పీకర్ గా ఉంటే అలాంటి పరిస్థితే ఎదురవుతుందనుకున్న బీజేపీ.. నేతలు వ్యూహాత్మకంగా ప్రొటెం స్పీకర్ గా .. సొంత ఎమ్మెల్యేను ప్రతిపాదించినట్లు తెలుస్తోంది. కర్ణాటకలో బీజేపీ ఉల్లంఘిస్తున్న ప్రజాస్వామ్య సంప్రదాయాల్లో ఇదీ కూడా ఒకటి. అధికారం కోసం ప్రజాస్వామ్య విలువలను మరికొంచెం దిగజార్చింది బీజేపీ. గవర్నర్ వ్యవస్థపై మరోసారి అపనమ్మకాన్ని కల్పించింది.