అల్లు అర్జున్ – త్రివిక్రమ్ కాంబినేష‌న్‌లో హ్యాట్రిక్ సినిమా ప‌ట్టాలెక్క‌బోతోంది. వీరిద్ద‌రి క‌ల‌యిక‌లో వ‌చ్చిన జులాయి, సన్నాఫ్ స‌త్య‌మూర్తి… ప్రేక్ష‌కుల‌కు వినోదాలు పంచాయి. ఆర్థిక ప‌రంగా జులాయి లాభాలు తెచ్చుకున్నా, సన్నాఫ్ స‌త్య‌మూర్తి బొటాబొటీగా గ‌ట్టెక్కింది. అయినా స‌రే.. మూడో సినిమాపై అంచ‌నాలు ఏర్ప‌డ్డాయి. దానికి తోడు `అర‌వింద స‌మేత వీర రాఘ‌వ` హిట్టుతో త్రివిక్రమ్ మ‌ళ్లీ ఫామ్‌లోకి వ‌చ్చిన‌ట్టే క‌నిపిస్తున్నాడు.
ఈ సినిమా ఈపాటికే ప‌ట్టాలెక్కాల్సింది. కానీ… ఎక్క‌డ వేసిన గొంగ‌ళి అక్క‌డే అన్న‌ట్టు త‌యారైంది ప‌రిస్థితి. త్రివిక్రమ్ క‌థ‌ని సిద్ధం చేయ‌డానికి స‌మ‌యం తీసుకుంటున్నాడ‌ని, అందుకే ఈ సినిమా ఆల‌స్యం అవుతోంద‌ని చెప్పుకుంటున్నారు. కానీ… త్రివిక్రమ్ వ‌ర్గీల వెర్ష‌న్ మ‌రోలా ఉంది. త్రివిక్రమ్ ఇప్ప‌టికే బ‌న్నీకి పూర్తి స్థాయి క‌థ వినిపించాడ‌ట. అయితే.. బ‌న్నీ క‌థ‌లో కొన్ని కీల‌క‌మైన మార్పులు చెప్పాడ‌ట. ఆ మార్పుల విష‌యంలోనే బ‌న్నీ – త్రివిక్రమ్ త‌ర్జ‌న భ‌ర్జ‌న‌లు ప‌డుతున్నార‌ని టాక్‌. సాధార‌ణం ర‌చ‌యితే ద‌ర్శ‌కుడైతే… తాను రాసుకున్న స‌న్నివేశాల‌పై, క‌థ‌పై విప‌రీత‌మైన ప్రేమ ఉంటుంది. ఒక్క‌సారి పెన్ను పెట్టిన త‌ర‌వాత.. ఎవ‌రేం చెప్పినా విన‌బుద్ధి కాదు. ప్ర‌స్తుతం త్రివిక్రమ్ తో స‌మ‌స్య కూడా అదే. బ‌న్నీకి ‘నా పేరు సూర్య – నా ఇల్లు ఇండియా’ రిజ‌ల్ట్‌తో భ‌యాలు ఎక్కువ‌య్యాయి. ఏదీ ఓ ప‌ట్టాన న‌చ్చ‌డం లేదు. అందుకే.. త్రివిక్రమ్ క‌థ‌లోనూ త‌ప్పుల్ని వెదుకుతున్నాడ‌ని తెలుస్తోంది. అందుకే.. ఈ సినిమా స్క్రిప్టు ద‌గ్గ‌రే మ‌ల్ల‌గుల్లాలు ప‌డుతోంద‌ని, ఈ వ్య‌వ‌హారం ఓ కొలిక్కి వ‌చ్చేంత వ‌ర‌కూ త‌దుప‌రి అడుగు ప‌డే ప్ర‌సక్తే లేద‌ని స‌మాచారం.
