ఏప్రిల్‌లో కొత్త సినిమాల హవా ఎక్కువ‌గానే క‌నిపిస్తోంది. వారానికి ఒక సినిమా బాక్సాఫీసు ద‌గ్గ‌ర సంద‌డి చేయ‌బోతోంది. ఏప్రిల్ 19న మాత్రం రెండు సినిమాలు ఢీ కొట్ట‌బోతున్నాయి. అటు నాని `జెర్సీ`, ఇటు లారెన్స్ `కాంచ‌న 3` ప్రేక్ష‌కుల ముందుకు వ‌స్తున్నాయి. నిజానికి నానికి లారెన్స్ సినిమా పోటీ కాదు. కానీ… నాని వ‌సూళ్ల‌కు కళ్లెం వేసే స్టామినా మాత్రం లారెన్స్ సినిమాకి ఉంటుంది. గ‌తంలో వ‌చ్చిన లారెన్స్ హార‌ర్ చిత్రాలు బాక్సాఫీసు ద‌గ్గ‌ర కాసుల వ‌ర్షం కురిపించుకున్నాయి. సీ సెంట‌ర్ల‌లో లారెన్స్ సినిమాల‌కు మంచి ఓపెనింగ్స్ వ‌స్తుంటాయి. సో.. నానికి సోలోగా వ‌చ్చే ఎడ్వాంటేజ్‌కి కాంచన 3 గండి కొడుతున్న‌ట్టే అనుకోవాలి. నాని `జెర్సీ` సినిమా మే 1కి వాయిదా ప‌డే అవ‌కాశాలున్నాయ‌ని, అందుకే… ఏప్రిల్ 19న వ‌స్తున్నామ‌ని `కాంచ‌న 3` వ‌ర్గాలు చెబుతున్నాయి. తెలుగు తమిళ భాష‌ల్లో ఒకేసారి `కాంచ‌న 3` విడుద‌ల అవుతోంది. అందుకే రిలీజ్ డేట్ విష‌యంలో ప‌క్కాగా ఉండాల్సిందే. నాని సినిమా వెన‌క్కి వెళ్తుంద‌న్న ధీమాతోనే కాంచ‌న 3 రిలీజ్‌డేట్ ఫిక్స్ చేసుకుంది. ఒక‌వేళ నాని సినిమా వాయిదా ప‌డ‌క‌పోతే మాత్రం `కాంచ‌న 3` వెన‌క్కి వెళ్ల‌డం ఖాయంగా క‌నిపిస్తోంది. ఈ రెండింటిలో ఏం జ‌రుగుతుందో చూడాలి.