అల్లు అర్జున్‌తో సినిమా విష‌యంలో… సుకుమార్ వేగం పెంచాడు. ఓవైపు స్క్రిప్టుని పూర్తి స్థాయిలో సిద్ధం చేస్తూనే మ‌రోవైపు లొకేష‌న్ల వేట‌లో బిజీగా ఉన్నాడు. మ‌హేష్ కోసం రాసుకున్న ఎర్ర‌చంద‌నం బ్యాక్ డ్రాప్ క‌థ‌ని ఇప్పుడు అల్లు అర్జున్ తో తీస్తున్న సంగ‌తి తెలిసిందే. తిరుప‌తి నేప‌థ్యంలో ఈ క‌థ న‌డుస్తుంద‌ని తెలుస్తోంది. దానికి త‌గ్గ‌ట్టుగానే తిరుమ‌ల చుట్టుప‌క్క‌ల అడ‌వుల్లో సుకుమార్ రెక్కీ నిర్వ‌హిస్తున్నాడ‌ట‌. త‌న క‌థ‌కు అనువైన లొకేష‌న్ల‌ను ఎంచుకుంటున్న‌ట్టు తెలుస్తోంది. `రంగ‌స్థ‌లం` కోసం ప‌ల్లెటూరు సెట్‌ని హైద‌రాబాద్‌లోనే వేయించాడు సుకుమార్‌. ఇప్పుడు అడ‌వికి సంబంధించిన సీన్ల‌ను కూడా.. సెట్ వేసి తీయాల‌ని భావిస్తున్నాడు. కొన్ని స‌న్నివేశాల్ని ద‌ట్ట‌మైన అడ‌విలో తీయాల్సివుంది. అవి మాత్రం రియ‌ల్ లొకేష‌న్ల‌లోనే తెర‌కెక్కిస్తారు. అందుకే ఇప్పుడు సుకుమార్ అడ‌వి బాట ప‌ట్టాడు. ఈనెల‌లోనే ఈ చిత్రానికి కొబ్బ‌రికాయ కొడ‌తారు. త్రివిక్ర‌మ్ సినిమా పూర్త‌య్యాక‌.. సుకుమార్ సినిమా ప‌ట్టాలెక్కే ఛాన్స్ ఉంది.