సూప‌ర్ హిట్ పాట‌ల్ని రీమిక్స్ చేసి వినిపించ‌డం మ‌న ఇండ‌స్ట్రీకి కొత్తేం కాదు. అయితే ఎక్కువ‌గా స్టార్ల వార‌సుల సినిమాల కోస‌మే ఆ ప్ర‌య‌త్నాలు జ‌రుగుతుంటాయి. సినిమాల ప్ర‌మోష‌న్‌కి ఆ పాట‌లు బాగా ఉప‌యోగ‌పడ‌టంతో పాటు… మ‌రోసారి కొత్త‌గా వినిపించ‌డం, కొత్త‌గా వాటిలో ఆడిపాడ‌టం అనేది ఫ్యాన్స్‌లో ఆస‌క్తిని రేకెత్తించే విష‌యం. అందుకే విరివిగా రీమిక్స్ అవుతుంటాయి. చిరంజీవి సినిమాలోని పాట‌లు సాయిధ‌‌ర‌మ్ తేజ్ సినిమాల్లో ఎక్కువ‌గా వినిపిస్తుంటాయి. రామ్‌చ‌ర‌ణ్ కూడా ఆ పాట‌ల్ని బాగా వాడాడు. కృష్ణ సినిమాల్లోని పాట‌లు మ‌హేష్‌, సుధీర్‌బాబు సినిమాల్లో వినిపించాయి. తాజాగా మ‌రోసారి కృష్ణ సూప‌ర్‌హిట్ పాట `జుంబారే…. `ని ఆయ‌న మ‌న‌వ‌డు గ‌ల్లా అశోక్ సినిమా కోసం రీమిక్స్ చేశారు. గల్లా అశోక్ క‌థానాయ‌కుడిగా శ్రీరామ్ ఆదిత్య ద‌ర్శ‌క‌త్వంలో ఓ సినిమా తెర‌కెక్కుతున్న సంగ‌తి తెలిసిందే. కృష్ణ త‌న‌య గ‌ల్లా ప‌ద్మావ‌తి త‌న‌యుడే గ‌ల్లా అశోక్‌. తాత పాట‌ని మ‌న‌వ‌డు వాడేశాడ‌న్న‌మాట‌. అశోక్ తొలి చిత్రం గ్రాండ్‌గా తెర‌కెక్కుతోంది. సినిమాలో ఆయ‌న స‌ర‌స‌న నిధి అగ‌ర్వాల్ న‌టిస్తోంది. జుంబారే పాట‌లో అశోక్‌, నిధి క‌లిసి చేస్తున్న హంగామా, ఆ గ్రాండ్‌నెస్ ఆక‌ట్టుకుంటోంది.