మ‌న హీరోలు ఎంత క‌మ‌ర్షియ‌ల్ ఫార్మెట్ లో ఆలోచించినా – అందులో ఎంతో కొంత సామాజిక కోణం ఉండేలా జాగ్ర‌త్త ప‌డుతున్నారు. శ్రీ‌మంతుడు నుంచి మహేష్ అయితే ప్ర‌తీ సినిమాలోనూ ఏదో ఓ రూపంలో సందేశం ఇవ్వ‌డానికే ప్ర‌య‌త్నిస్తున్నాడు. దాని చుట్టూనే త‌న క‌థ‌లు తిరుగుతున్నాయి. `స‌ర్కారు వారి పాట`లో కూడా అలాంటి విష‌యాలు చాలానే ఉన్న‌ట్టు టాక్.
అయితే.. ప‌తాక స‌న్నివేశాల్లో మాత్రం మహేష్ ఆర్థిక వ్య‌వ‌స్థ‌పై సెటైర్లు కుమ్మ‌రించాడ‌ట. బ‌డా హీరో సినిమా అంటే క్లైమాక్స్ లో భారీ ఫైట్ ఉంటుంది. దానికి తోడు… మహేష్ పై డైలాగులు ద‌ట్టించారని టాక్. హీరో దాదాపుగా 5 నిమిషాల సుదీర్ఘ‌మైన స్పీచ్ ఇస్తాడ‌ని, ఇందులో రాజ‌కీయ, ఆర్థిక రంగాల‌పై సెటైర్లు ఉంటాయ‌ని తెలుస్తోంది. ల‌క్ష‌ల కోట్లు అప్పు ఎగ్గొట్టిన విజ‌య్ మాల్యా నుంచి… అప్పు కోసం బ్యాంకుల చుట్టూ తిరుగుతున్న రైతు వ‌ర‌కూ ప్ర‌తీ ఒక్క‌రినీ ప్ర‌స్తావిస్తూ ఈ డైలాగ్ సాగుతుంద‌ని, ఓర‌కంగా సినిమాకి ఇదే.. ఆత్మ అని స‌మాచారం. `బిజినెస్ మెన్` సినిమా క్లైమాక్స్‌లోనూ మహేష్ ఇలాంటి డైలాగులే చెప్పాడు. అవి డైన‌మైట్ల‌లా పేలాయి. ఇప్ప‌టికీ ఆ డైలాగులు వినిపిస్తున్నాయి. మ‌రి ఈసారి ప‌ర‌శురామ్ ఎలాంటి మ్యాజిక్ చేయిస్తాడో చూడాలి.
