ఉప్పెన‌తో టాలీవుడ్ కి తాకిన యువ కెర‌టం.. కృతి శెట్టి. ఈసినిమాతో స్టార్ అయిపోయింది కృతి. ఇప్పుడు పెద్ద సినిమాలో హీరోయిన్ అంటే, ముందుగా కృతి పేరే చ‌ర్చ‌ల్లోకి వ‌స్తోంది. ఇటీవ‌ల‌… శ్యామ్ సింగ‌రాయ్ తో మెరిసింది. ఈ సంక్రాంతికి బంగార్రాజులోనూ సంద‌డి చేయ‌బోతోంది. ఆ అమ్మాయి గురించి మీకు చెప్పాలితో పాటుగా రామ్ తో ఓ సినిమా చేస్తోంది. ఇప్పుడు మెగా బ్యాన‌ర్‌లో ఓ సినిమా చేయబోతున్న‌ట్టు టాక్‌. చిరంజీవి కుమార్తె సుస్మిత నిర్మాత‌గా మారిన సంగతి తెలిసిందే. త‌న బ్యాన‌ర్‌లో కొత్త కొత్త సినిమాలు రూపొంద‌నున్నాయి. ఉయ్యాల జంపాల‌తో ఆక‌ట్టుకున్న విరించి వ‌ర్మ ఈ చిత్రానికి ద‌ర్శ‌కుడు. ఇదో లేడీ ఓరియెంటెడ్ చిత్ర‌మని, క‌థానాయిక‌గా కృతిని ఎంచుకున్నార‌ని స‌మాచారం.

నిజానికి ఏ స్టార్ హీరోయిన్ అయినా, కెరీర్‌లో ఓ ద‌శ‌కు చేరుకున్నాకే, లేడీ ఓరియెంటెండ్ సినిమాల్లో న‌టించ‌డానికి మొగ్గు చూపిస్తుంటారు. ఓసారి… ఈ దిశ‌గా కెరీర్ ట‌ర్న్ అయ్యాక‌.. త‌మ‌కు గ్లామ‌ర్ పాత్ర‌లు రావ‌ని, పెద్ద హీరోలు త‌మ వైపు చూడ‌ర‌ని వాళ్ల భ‌యాలు. అయితే.. కృతి కెరీర్ మొద‌లెట్టిన కొత్త‌లోనే లేడీ ఓరియెంటెడ్ పాత్ర‌ని ఎంచుకోవ‌డం నిజంగా సాహ‌స‌మే. కాక‌పోతే.. ఇదేం సీరియ‌స్ డ్రామా కాద‌ని, ఈత‌రం అమ్మాయిలాంటి పాత్ర‌లోనే కృతి క‌నిపించ‌బ‌తోంద‌ని, అందుకే ఈ సినిమా ఒప్పుకుంద‌ని ఇండ్ర‌స్ట్రీ వ‌ర్గాల టాక్‌. అతి త్వ‌ర‌లోనే ఈ సినిమాకి సంబంధించిన అధికారిక ప్ర‌క‌ట‌న విడుదల కానుంది.