భీమ్లా నాయ‌క్ ఆల్బ‌మ్‌లో `అంత‌మిష్ట‌మేంద‌య్యా` పాట‌ సూప‌ర్ హిట్ అయ్యింది. అయితే ఈ పాట సినిమాలో లేదు. లెంగ్త్ స‌మ‌స్య‌ వ‌ల్ల ఈ పాట తీసేశామ‌ని చిత్ర‌బృందం చెబుతోంది. ఈ పాట‌కు అంత స్కోప్ లేద‌ని కూడా అంది. నిజానికి ‘భీమ్లా.. ‘ లెంగ్తీ సినిమా ఏం కాదు. ర‌న్ టైమ్ చాలా షార్ప్‌గా ఉంటుంది. పాటకూ స్పేస్ ఉంద‌క్క‌డ‌. నిజానికి హిట్ సినిమా పాట‌ల్ని… సినిమాలోంచి తొల‌గించడానికి ఎవ‌రూ ఇష్ట‌ప‌డ‌రు. స్టార్ సినిమాల్లో పాట పెడితే, లెంగ్త్ స‌మ‌స్య వ‌స్తుంద‌ని ఎవ‌రూ అనుకోరు. పాట ప‌క్క‌న పెట్ట‌డానికి ఏదో ఓ బ‌ల‌మైన కార‌ణం ఉంద‌న్న‌ది టాలీవుడ్ టాక్‌.

అది ఇప్పుడు బ‌య‌ట‌కు వ‌చ్చింది. ఈ పాట‌లో ప‌వ‌న్ – నిత్య‌మీన‌న్‌ల‌పై తెర‌కెక్కించారు. చిత్ర‌బృందంలోని ఓ ముఖ్య‌మైన స‌భ్యుడికీ, నిత్య‌కీ మ‌ధ్య చిన్న‌పాటి క్లాష్ వ‌చ్చింద‌ని, నిత్య‌పై కోపాన్ని ఎలా చూపించాలో తెలీక‌…ఆ పాట కత్తిరించార‌న్న‌ది ఇన్ సైడ్ వ‌ర్గాల టాక్‌. ‘భీమ్లా నాయ‌క్‌’ ప్రీ రిలీజ్ ఫంక్ష‌న్‌లో నిత్య క‌నిపించ‌లేదు. స‌క్సెస్ మీట్ కి రాలేదు. ప్ర‌మోష‌న్లు స‌రేస‌రి. ‘భీమ్లా..’ ప్రీ రిలీజ్ ఫంక్ష‌న్ స‌మ‌యానికి నిత్య హైద‌రాబాద్ లోనే ఉంద‌ని, అయినా స‌రే, రాలేద‌ని మ‌రో టాక్ కూడా వినిపిస్తోంది. ఇదంతా చూస్తుంటే నిత్య‌కీ, ఈ టీమ్ లో ఓ కీల‌క‌మైన స‌భ్యుడికీ ఏదో అయ్యే ఉంటుంద‌నిపిస్తోంది.