బాల‌య్య‌ని చూపించాలంటే బోయ‌పాటి త‌ర‌వాతే ఎవరైనా. ఈ విష‌యాన్ని బాల‌య్య అభిమానులు కూడా గ‌ట్టిగా న‌మ్ముతారు. అందుకే బాల‌య్య – బోయ‌పాటిల‌ది సూప‌ర్ హిట్ కాంబోగా నిలిచింది. బోయపాటి తో హిట్టుకొట్టాక‌, బాల‌య్య‌కు వ‌రుస‌గా దెబ్బ‌మీద దెబ్బ త‌గులుతూ వ‌స్తోంది. సింహా, లెజెండ్ ల త‌ర‌వాత బాల‌య్య‌కు వ‌రుస‌గా ఫ్లాపులే ఎదుర‌య్యాయి. బోయ‌పాటి చూపించిన‌ట్టు బాల‌య్య‌ని ఇంకెవ్వ‌రూ చూపింక‌పోవ‌డం, బాల‌య్య సినిమాపై పెరిగిపోయిన అంచనాల‌కు త‌గ్గ‌ట్టుగా క‌థ‌ల్ని, క్యారెక్ట‌రైజేష‌న్ల‌నీ సృష్టించ‌క‌పోవ‌డంతో.. ఫ్లాపులు త‌గిలాయి. `అఖండ‌` త‌ర‌వాత గోపీచంద్ మ‌లినేని ద‌ర్శ‌క‌త్వంలో బాల‌య్య ఓ సినిమా చేస్తున్న సంగ‌తి తెలిసిందే. గోపీచంద్ మ‌లినేనికి `క్రాక్‌` లాంటి హిట్ ఉంది. అందుకే.. ఈ కాంబోపై న‌మ్మ‌కాలు పెరిగాయి.

గోపీచంద్ కూడా బాల‌య్య‌ని చూపించ‌డంలో బోయ‌పాటి స్టైల్ ని ఫాలో అవుతున్నాడ‌ట‌. బోయ‌పాటి సినిమాల్లో హీరోయిజం పీక్స్‌లో ఉంటుంది. విల‌న్ కూడా అంతే స్ట్రాంగ్ గా ఉంటుంది. ఈ సినిమాలోనూ బ‌ల‌మైన విల‌న్ పాత్ర‌ని సృష్టించాడ‌ట‌. ఫైట్లు, అందులోని ఎలివేష‌న్ల‌ని… బోయ‌పాటి మార్క్‌లోనే రాసుకొన్నాడ‌ని, అదే స్థాయిలో తీస్తున్నాడ‌ని టాక్. బోయపాటి సినిమాల్లో బాల‌య్య డైలాగులు చాలా ప‌వ‌ర్‌ఫుల్ గా ఉంటాయి. అందులో.. బూతులు కూడా య‌దేచ్ఛ‌గా వాడేస్తుంటారు. ఈ సినిమాలోనూ `బీప్‌`లు ప‌డే స్థాయిలో కొన్ని డైలాగులు ప‌డ్డాయ‌ట‌. ముఖ్యంగా విల‌న్ తో ఢీ కొట్ట‌వ‌ల‌సివ‌చ్చిన‌ప్పుడు.. బాల‌య్య డైలాగులు ఓ రేంజ్‌లో ఉంటాయ‌ని, అందులో బూతులు కూడా వినిపించ‌నున్నాయ‌ని టాక్. మొత్తానికి బాల‌య్య ఫ్యాన్స్‌కి న‌చ్చేలా గోపీచంద్ ఈ సినిమా తీస్తున్నాడ‌ని, ఈ సినిమా త‌ర‌వాత‌.. బోయ‌పాటి త‌ర‌వాత‌.. బాల‌య్య‌ని అంత గొప్ప‌గా చూపించే ద‌ర్శ‌కుడు గోపీచంద్ మ‌లినేని అనే పేరొస్తుంద‌ని, ఈ సినిమా ర‌షెష్ చూసిన‌వాళ్లు చెబుతున్నమాట‌. బాల‌య్య ఫ్యాన్స్‌కి కూడా కావ‌ల్సింది అదే క‌దా.