తెలంగాణ బీజేపీ అధ్యక్షునిగా బండి సంజయ్ పదవి కాలం పూర్తయింది. అయితే ఎన్నికలు దగ్గర పడినందున ఆయన నేతృత్వంలోనే ఎన్నికలు జరుగుతాయని.. ఆయనను కొనసాగించేందుకు హైకమాండ్ ఆసక్తితో ఉందన్న ప్రచారం కొన్నాళ్లుగా జరుగుతోంది. తెలంగాణ బీజేపీ వ్యవహారాల ఇంచార్జ్ తరుణ్ చుగ్ కూడా ఈ విషయం ప్రకటించారు. కానీ అధికారిక ప్రకటన మాత్రం ఢిల్లీ నుంచి వెలువడలేదు.
దీనికి కారణం సంజయ్ విషయంలో హైకమాండ్ వద్ద సానుకూలత ఉంది కానీ.. రాష్ట్ర నేతల్లో మాత్రం తీవ్ర వ్యతిరేకత కనిపిస్తోంది. అందుకే ప్రకటన ఆలస్యం అవుతోందన్న వాదన వినిపిస్తోంది. పార్టీ రాష్ట్ర శాఖ అధ్యక్ష బాధ్యతలు తీసుకున్న తర్వాత సంజయ్‌లా ఇమేజ్ పెంచుకున్న వారు లేరు. ఈ కారణంగా సంజయ్‌కు సీనియర్ల మధ్య గ్యాప్ ప్రారంభమయింది. బండి ఒకవైపు.. సీనియర్లు మరోవైపు అనేలా పరిస్థితులున్నాయి. అందర్నీ కలుపుకుని వెళ్లడం లేదన్న ఫిర్యాదులు హైకమాండ్ వద్దకు వెళ్లాయి.
ఇతర పార్టీల నుంచి బీజేపీలో చేరిన ఈటల రాజేందర్, కోమటిరెడ్డి రాజగోపాలరెడ్డి, వివేక్ లాంటి నేతలు, కేంద్రమంత్రి కిషన్‌రెడ్డితోపాటు ఇతర సీనియర్లు సంజయ్ విషయంలో వ్యతిరేకతతో ఉన్నారు. బండి సంజయ్ దూకుడు తరచూ చేస్తున్న వ్యాఖ్యలు వివాదాస్పదమవుతున్నాయి. కవిత విషయంలో ఆయన చేసిన కామెంట్స్ కేసుల వరకూ వెళ్లాయి. ఇలాంటివి బీజేపీకి మైనస్‌గా మారుతున్నాయని.. ఆయన దూకుడు వల్ల పార్టీకి ఎంత లాభమో.. అంత కంటే ఎక్కువ నష్టం జరుగుతోందన్న అభిప్రాయాన్ని సీనియర్లు వినిపిస్తున్నారు.
బండి సంజయ్ కొనసాగింపును అడ్డుకోవాలని సీనియర్ నేతలు కొంత మంది తీవ్రంగా ప్రయత్నిస్తున్నారు. అయితే కొనసాగింపు ఖాయమని .. అధికారిక ప్రకటన వచ్చిన వెంటనే మరింత దూకుడుగావెళ్లాలని బండి సంజయ్ ప్లాన్ చేసుకుంటున్నారు.
