ఈమ‌ధ్య సుకుమార్ శిష్యుల సుడి సూప‌ర్ స్పీడులో తిరుగుతోంది. ఉప్పెన‌తో బుచ్చిబాబు స్టార్ డైరెక్ట‌ర్ అయిపోయాడు. 18 పేజీస్‌తో సూర్య ప్ర‌తాప్ మ‌రో హిట్టు కొట్టాడు. మొన్న‌టికి మొన్న‌… ద‌స‌రాతో శ్రీ‌కాంత్ ఓదెల పేరు మార్మోగిపోయింది. అలా.. ఇది కాస్త సుకుమార్ శిష్యుల సీజ‌న్ అయిపోయింది. ఇప్పుడు విరూపాక్ష రాబోతోంది. సాయిధ‌ర‌మ్ తేజ్ హీరోగా న‌టించిన ఈ సినిమాతో కార్తీక్ ద‌ర్శ‌కుడిగా మారాడు. ఈయ‌నా సుకుమార్ శిష్యుడే. ఈ సినిమాకి క‌థ‌, స్క్రీన్ ప్లే కూడా సుకుమార్ అందించ‌డం విశేషం. అంతే కాదు.. ఈ సినిమా మొత్తానికి క‌ర్త‌, క‌ర్మ‌, క్రియ ఆయ‌నే. ఈ క‌థ‌ని సాయిధ‌ర‌మ్ తేజ్ ద‌గ్గ‌ర‌కు పంపిన ద‌గ్గ‌ర్నుంచి.. ప్రాజెక్ట్ సెట్ చేసేంత వ‌ర‌కూ అన్ని వ్య‌వ‌హారాలూ ఆయ‌నే చూసుకొన్నారు. సుకుమార్ హ్యాండ్ ప‌డిన ఏ సినిమా నిరాశ ప‌ర‌చ‌లేదు. విరూపాక్ష టీజ‌ర్ డీసెంట్ గా క‌నిపిస్తోంది. తేజ్ కూడా ఈ సినిమాపై చాలా న‌మ్మ‌కంగా ఉన్నాడు. ఇదో థ్రిల్ల‌ర్ క‌థ‌. సుకుమార్ అంటే.. ల‌వ్ స్టోరీలు ఆశిస్తాం. కానీ ఈసారి థ్రిల్ల‌ర్ తో స‌ర్‌ప్రైజ్ చేయ‌బోతున్నాడు సుకుమార్‌. ఆయ‌న ల‌క్‌.. ఈ సినిమాకీ క‌ల‌సి వ‌స్తే… విరూపాక్ష తేజ్ ఖాతాలో మ‌రో హిట్ గా నిల‌వ‌డం ఖాయం.