బాలీవుడ్ లో రెండొంద‌లు కోట్లు తెచ్చిన సినిమా ‘భూల్ భులాయా 2’. బాలీవుడ్ వ‌రుస ఫ్లాపుల్లో ఉన్న‌ప్పుడు ఊర‌ట‌గా వ‌చ్చిన సూప‌ర్ హిట్ ఇది. ఇప్పుడు ఈ సినిమాని తెలుగులో రీమేక్ చేస్తున్నారు. రీమేక్ రైట్స్ జ్ఞాన‌వేల్ రాజా ద‌క్కించుకొన్నారు. ర‌మేష్ వ‌ర్మ ఈ చిత్రానికి ద‌ర్శ‌కుడు. రాక్షసుడు రీమేక్ తో.. ఓ మంచి హిట్ కొట్టాడు ర‌మేష్ వ‌ర్మ‌. అందుకే ఆయ‌న చేతికి మ‌రో రీమేక్ వ‌చ్చింది. క‌థ సిద్ధం, నిర్మాత‌, డైరెక్ట‌ర్ రెడీ. మ‌రి ఈ సినిమాలో హీరో ఎవ‌రన్న‌ది పెద్ద ప్ర‌శ్న‌.

నిన్నా మొన్న‌టి వ‌ర‌కూ నాగ చైత‌న్య ఈ సినిమా చేస్తున్నాడ‌ని వార్త‌లొచ్చాయి. అయితే… చైతూ ఇందులో న‌టించ‌డం లేద‌ని పీఆర్ టీమ్ క్లారిటీ ఇచ్చింది. నిజానికి ఈ క‌థ చైతూ ద‌గ్గ‌ర‌కే వెళ్ల‌లేదు. మ‌రి ఆ వార్త‌లు ఎలా పుట్టాయో? ఈ క‌థ‌కున్న మూడు బెస్ట్ ఆప్ష‌న్స్‌… క‌ల్యాణ్‌రామ్‌, వ‌రుణ్‌తేజ్‌, నితిన్‌. ఈ ముగ్గురు చుట్టూనే ఈ స్క్రిప్టు తిరుగుతోంది. క‌ల్యాణ్ రామ్ ఈ సినిమా చేయ‌డానికి రెడీగానే ఉన్నాడు. ఆయ‌న‌కే ఖ‌రారయ్యే అవ‌కాశాలున్నాయి. అయితే వ‌రుణ్‌, నితిన్‌ల‌కు ఈ సినిమా ఇంకా బాగుంటుంది. వాళ్ల ఎన‌ర్జీకి ఈ క‌థ మ్యాచ్ అవుతుంది. కాక‌పోతే ఎవ‌రు చేసినా.. మినిమం గ్యారెంటీ సినిమా అవ్వ‌డం ఖాయం. మ‌రి ఈ హార‌ర్ సినిమా ఏ హీరోకి ద‌క్కుతుందో తెలియాలంటే ఇంకొన్ని రోజులు ఆగాలి.