”నాయకుడు అనే పదానికి సరైన అర్థం చంద్రబాబు. అలాంటి ఆయన్ని 74 ఏళ్ల వయసులో అరెస్టు చేసి జైల్లో పెట్టినందుకు ప్రతి ఒక్కరూ రగిలిపోతున్నారు. అభివృద్ధి గురించి ఆలోచించే వ్యక్తికి ఇలాంటి పరిస్థితి రావడం శోచనీయం” అన్నారు సీనియర్ నటుడు మురళీ మోహన్‌. మాజీ ముఖ్యమంత్రి నారా చంద్రబాబు నాయుడు అరెస్టును నిరసిస్తూ ఆయనకు మద్దతుగా తెలుగు చిత్రపరిశ్రమకు చెందిన ప్రముఖులు తాజాగా ‘చంద్రబాబు గారితో మనం’ అనే కార్యక్రమాన్ని ఏర్పాటు చేశారు.
మురళీ మోహన్‌ అధ్యక్షతన ఫిల్మ్‌ ఛాంబర్‌లో జరిగిన ఈ కార్యక్రమంలో ఆయన మాట్లాడుతూ.. అడవిలో ఉండే పులులు, సింహాలు వేటకు వెళ్లినప్పుడు నాలుగు అడుగులు వెనక్కి వేసి.. రెట్టించిన ఉత్సాహంతో ముందుకు దూకుతాయి. ఇప్పుడు చంద్రబాబు సింహాలా బయటికివస్తారు వేటాడుతారు. చంద్రబాబుకి ఇది గ్రహణంలాంటిది. గ్రహణం విడిచిన తర్వాత ఆయన కూడా మరింత వెలుగులతో కడిగిన ముత్యంలా బయటకు వస్తారు. రెట్టించిన ఉత్సాహంతో చంద్రబాబు మళ్లీ సిఎం అవుతారు”అని పేర్కొన్నారు. ఈ కార్యక్రమంలో పాల్గొన్న సినీ ప్రముఖులంతా… మచ్చలేని మనిషిని అక్రమంగా అరెస్ట్ చేశారని, చంద్రబాబును అరెస్ట్ చేయడం తగదని.. తక్షణమే ఆయన్ని విడుదల చేయాలని డిమాండ్‌ చేశారు.
