కథానాయికల కెరీర్ జోరుగానే సాగిపోతుంటుంది. హీరోలు ఓ కథని పట్టాలెక్కించాలంటే వాళ్ళ ఇమేజ్ మొదలకొని బోలెడు లెక్కలు వేసుకోవాలి. హీరోయిన్స్ కి అలా కాదు.. మంచి కాంబినేషన్ చూసుకొని సంతకాలు చేసేస్తారు. అందుకే ఏడాదికి కనీసం రెండు సినిమాలైన ఖాతాలో వేసుకుంటారు. 2023లో స్టార్ హీరోయిన్స్ జోరు బాగానే కనిపించింది. 2024లోనూ ఆ వేగం కొనసాగేలా కనిపిస్తోంది. వివరాల్లోకి వెళితే..

గత ఏడాది శ్రుతి హాసన్ జాక్ పాట్ కొట్టింది. వీరసింహా రెడ్డి, వాల్తేరు వీరయ్య, సలార్ లాంటి పెద్ద విజయాలు అందుకుంది. ప్రస్తుతం ఆమె చేతిలో అడివి శేష ‘డకాయిట్‌’ సినిమా వుంది. ఇది కాకుండా హాలీవుడ్ చిత్రం ‘ది ఐ’ కూడా ఈ సంవత్సరంలోనే ప్రేక్షకుల ముందుకొచ్చే అవకాశముంది. సలార్ 2 లో కూడా ఆమె పాత్ర కీలకం కానుంది. ఇవి కాకుండా సెట్స్ కి వెళ్ళడానికి సిద్ధంగా వున్న కొన్ని ప్రాజెక్ట్స్ కోసం శ్రుతి హాసన్ పేరుని పరిశీలిస్తున్నారు.

గత ఏడాది ‘వారసుడు, ‘యానిమల్‌’చిత్రాలతో అలరించిన రష్మిక.. ఈ ఏడాది కూడా అదే జోరు కొనసాగించడానికి సిద్ధంగా వుంది. అందరూ ఎదురుచూస్తున్న అల్లు అర్జున్‌ ‘పుష్ప 2: ది రూల్‌’లో శ్రీవల్లిగా మరోసారి అలరించబోతుంది. పార్ట్ 2 లో ఆమె పాత్ర కథలో చాలా కీలకం కానుందని సమాచారం. ఈ కథలో ఎమోషనల్ కోణం శ్రీవల్లి పాత్రతో వస్తుందని చెబుతున్నారు. ఇది కాకుండా ఆమె ప్రధాన పాత్రలో ‘రెయిన్‌బో’, ‘ది గర్ల్‌ ఫ్రెండ్‌’ సినిమాలు చిత్రీకరణ జరుపుకుంటున్నాయి.

‘దసరా’ విజయంతో 2023ని ముగించిన కీర్తి సురేశ్‌.. ఈ యేడాది కూడా తన జోరు చూపించబోతుంది. నేరుగా తెలుగు సినిమాలు ప్రస్తుతానికి చేయనప్పటికీ ఆమె చేతిలో ‘రఘుతాత’, ‘రివాల్వర్‌ రీటా’, ‘కన్నివేడి’ సినిమాలున్నాయి. ఈ చిత్రాలన్నీ తెలుగు డబ్బింగ్ గా ప్రేక్షకులు ముందుకు రాబోతున్నాయి.

సమంత 2023 మిశ్రమ ఫలితాన్ని ఇచ్చింది. ఆమె టైటిల్ రోల్ లో చేసిన శాకుంతలం బాక్సాఫీసు వద్ద తీవ్రంగా నిరాశపరిచింది. అయితే విజయ్ దేవరకొండతో చేసిన ఖుషి విజయం ఆమెలో జోష్ నింపింది. అనారోగ్యం సమస్యల నుంచి కోలుకున్న సమంత ఈ ఏడాది వరుస ప్రాజెక్ట్స్ చేసే అవకాశం వుంది. సామ్ నటించిన ‘సిటాడెల్‌’ ఓటీటీ సిరీస్‌ ప్రేక్షకుల ముందుకు రావడానికి సిద్ధంగా వుంది.

గత ఏడాది మరో ఇద్దరు సీనియర్ హీరోయిన్స్ కాజల్, అనుష్క మళ్ళీ ట్రాక్ పైకి వచ్చారు. కాజల్‌.. ఈ ఏడాది ‘భారతీయుడు 2’, ‘సత్యభామ’ చిత్రాలతో ప్రేక్షకులు రానుంది. అలాగే ‘ఉమ’ అనే ఓ హిందీ సినిమా చేస్తోంది. గతేడాది ‘మిస్‌ శెట్టి మిస్టర్‌ పొలిశెట్టి’ చిత్రంతో ఆకట్టుకున్న అనుష్క.. ప్రస్తుతం కొత్త కథలపై ద్రుష్టి పెట్టింది. భాగమతి కి పార్ట్ 2 చేయడానికి సన్నాహాలు జరుగుతున్నాయి. ‘కథనార్‌ – ది వైల్డ్‌ సోర్సెరర్‌’ అనే మలయాళం సినిమా చేయడానికి అంగీకరించింది అనుష్క.

గత ఏడాది తీరిక లేకుండా వరుస సినిమాలతో గడిపింది శ్రీలీల. ఈ ఏడాది కూడా ఆమె డైరీ ఫుల్ గానే కనిపిస్తోంది. సంక్రాంతి బరిలో మహేశ్‌బాబుతో కలిసి ‘గుంటూరు కారం’తో సందడి చేయనుంది. అలాగే పవన్‌ కల్యాణ్‌ ‘ఉస్తాద్‌ భగత్‌ సింగ్‌’లోనూ ఆమెనే హీరోయిన్. వీటితో పాటు పలువురు స్టార్‌ హీరోల సినిమాల్లో హీరోయిన్ గా ఆమె పేరు వినిపిస్తోంది. ఈ ఏడాది కూడా ఆమె నుంచి సినిమా ప్రకటనల జోరు ఎక్కువగానే వుంటుందని తెలుస్తోంది.

శ్రీలీల తర్వాత ప్రామెసింగ్ గా వినిపిస్తున్న పేరు మీనాక్షి చౌదరి. అమె ఖాతాలో కూడా క్రేజీ సినిమాలు వున్నాయి. విజయ్ తో G.O.A.T , వరుణ్ తేజ్ తో మట్కా, దుల్కర్ తో లక్కీ భాస్కర్, విశ్వక్ సేన్ తో ఓ సినిమా ఆమె చేతిలో వున్నాయి. మహేష్ బాబుతో చేసిన ‘గుంటూరు కారం’ లో ఆకట్టుకుంటే కనుక…మీనాక్షి కెరీర్ మరింత జోరందుకుంటుందని చెప్పడంలో సందేహం లేదు.

తెలుగులో టాప్ హీరోయిన్స్ లో ఒకరైన పూజా హెగ్డే.. గత ఏడాది గ్యాప్ ఇచ్చింది. నిజానికి గుంటూరు కారంలో ఆమెనే హీరోయిన్. కానీ ఏవో కారణాలు వలన ఆమె స్థానంలోకి మీనాక్షి వచ్చింది. ప్రస్తుతం బాలీవుడ్ సినిమాలపై ద్రుష్టి పెట్టింది పూజా. సాహిద్ కపూర్ తో దేవా చిత్రం చేస్తోంది. ఒకవేళ ఈ ఏడాది అల్లు అర్జున్, త్రివిక్రమ్ సినిమా సెట్స్ పైకి వెళితే గనుక.. పూజాని హీరోయిన్ గా తీసుకునే అవకాశం వుంది.

సీతారామం తర్వాత సినిమాల సంఖ్య కంటే పాత్రలు ముఖ్యమని వాటి ఎంపికపై చాలా పర్టిక్యులర్ గా వున్న మృణాల్.. గత ఏడాది హాయ్ నాన్నతో మరో విజయాన్ని అందుకుంది. ప్రస్తుతం తమిళ్ లో ఓ రెండు ప్రాజెక్ట్స్ అంగీకరించిందని సమాచారం. ఇందులో లారెన్స్ తో చేసే ప్రాజెక్ట్ తెలుగు తమిళం ఏకకాలంలో రూపొందే అవకాశం వుంది.

సీనియర్ హీరోయిన్ త్రిష మళ్ళీ జోరు పెంచారు, గత ఏడాది లియో, పీఎస్ 2 తో సందడి చేసిన ఆమె.. ఇప్పుడు మెగాస్టార్ తో మరోసారి జతకట్టారు. వశిష్ట దర్శకత్వంలో చిరు చేస్తున్న సినిమాలో త్రిషనే హీరోయిన్. అలాగే మణిరత్నం కమల్ హసన్ థగ్ లైఫ్ లో త్రిషనే హీరోయిన్. ఇవి కాకుండా రామ్, ఐడెంటిటీ అనే మలయాళ సినిమాల్లో నటిస్తోంది.

పాత్రల ఎంపికలో చాలా పర్టిక్యులర్ గా వుండే సాయిపల్లవి ప్రస్తుతం తెలుగులో నాగచైతన్యతో కలిసి ‘తండేల్‌’లో నటిస్తోంది. ఇది కాకుండా బాలీవుడ్ లో రూపొందే రామాయణంలో సీత పాత్రలో కనిపించనుంది సాయిపల్లవి. మార్చిలో ఈ చిత్రం సెట్స్ పైకి వెళ్లనుంది.