చిరంజీవితో ఓ సినిమా చేయాల‌ని మారుతి ఎప్ప‌టి నుంచో అనుకొంటున్నారు. ఇది వ‌ర‌కు వీరి కాంబోలో ఓ సినిమా రాబోతోంద‌న్న వార్త‌లు కూడా హ‌ల్ చ‌ల్ చేశాయి. అంతా ఓకే అనుకొన్న త‌రుణంలో.. ఆ ప్రాజెక్ట్ ఎందుక‌నో ప‌ట్టాలెక్క‌లేదు. ‘విశ్వంభ‌ర‌’ త‌రవాత చిరు ఎవ‌రితో చేస్తారన్న సందిగ్ధం నెల‌కొన్న‌ప్పుడు మారుతి పేరు కూడా గ‌ట్టిగానే వినిపించింది. అయితే హ‌రీష్ శంక‌ర్ తో చిరు ప్రాజెక్ట్ దాదాపుగా ఫైన‌ల్ అయ్యింద‌న్న గాసిప్పులు మొద‌ల‌య్యాయి. ఇటీవ‌ల చిరుతో మారుతి భేటీ వేశారు. `విశ్వంభ‌ర‌` సెట్లో చిరంజీవిని క‌లుసుకొన్నారు. దాంతో.. చిరు – మారుతి కాంబోపై మ‌ళ్లీ ఆశ‌లు రేగాయి. ఈ కాంబోలో సినిమా వ‌స్తోంద‌ని, ‘విశ్వంభ‌ర‌’ త‌ర‌వాత అదే ప్రాజెక్ట్ ఉంటుంద‌ని చెప్పుకొంటున్నారు.

అయితే అస‌లు విష‌యం ఏమిటంటే, చిరుని మారుతి మ‌ర్యాద‌పూర్వ‌కంగానే క‌లుసుకొన్నారు. ఇద్ద‌రి మ‌ధ్య‌.. సినిమాకు సంబంధించి ఎలాంటి చ‌ర్చా రాలేదు. చిరు ఇప్పుడు ఆఫర్ ఇచ్చినా, మారుతికి వీలు కాదు. ఎందుకంటే ఆయ‌న ‘రాజాసాబ్‌’ వ‌ర్క్‌లో బిజీగా ఉన్నారు. ఈ యేడాదంతా ‘రాజాసాబ్‌’కే కేటాయించాల్సివుంది. చిరుతో సినిమా `ఓకే` అన్నా ఇప్ప‌టికిప్పుడు ప‌ట్టాలెక్కించే ఛాన్స్ లేదు. మారుతి చేతిలో కూడా చాలా క‌థ‌లున్నాయి. అల్లు అర్జున్‌, చ‌ర‌ణ్ లాంటి ఈ జ‌న‌రేష‌న్ హీరోల‌తో సినిమాలు చేయ‌డానికి ఉత్సాహం చూపిస్తున్నారు. అయితే.. చిరుతో సినిమా అనేది ఆయ‌న డ్రీమ్ ప్రాజెక్ట్. ఇప్పుడు కాక‌పోయినా, ఎప్ప‌టికైనా ఆ సినిమా ఉంటుంది. పైగా.. క‌థ కూడా సిద్ధంగానే ఉంది. కానీ ఇద్ద‌రికీ స‌మ‌యం కుద‌రాలంతే!