తాను న‌టించిన సినిమాపై ప్ర‌తీ హీరోకీ ఓ కాన్ఫిడెన్స్ ఉంటుంది. అది లేక‌పోతే సినిమాలే చేయ‌లేరు. ఈమ‌ధ్య చాలామంది హీరోలు ఓవ‌ర్ కాన్ఫిడెన్స్ తో ఇబ్బంది ప‌డుతున్నారు. ప్రీ రిలీజ్ ఫంక్ష‌న్ల‌లో ‘చించేస్తున్నాం.. చ‌రిత్ర మార్చేస్తాం’ అంటూ స్పీచులు అద‌ర‌గొడుతున్నారు. తీరా చూస్తే సినిమా ఫ‌ట్టు మంటోంది. శ‌ర్వానంద్ కాస్త డిఫ‌రెంట్. త‌న సినిమా ప్ర‌మోష‌న్ల‌లో ఎప్పుడూ ఎక్క‌డా ఆవేశ‌ప‌డిన దాఖ‌లాలు లేవు. సినిమా బాగున్నా, లేకున్నా.. అంతే ప్ర‌శాంతంగా ఉంటాడు. ఓవ‌ర్ కాన్ఫిడెన్స్ మాటే ఉండ‌దు. అయితే `మ‌న‌మే` విష‌యంలో శ‌ర్వా బాగా న‌మ్మ‌కాలు పెట్టుకొన్న‌ట్టు ఉన్నాడు. ‘ఈసారి బ్లాక్ బ‌స్ట‌ర్ ప‌క్కా… కావాలంటే రాసి పెట్టుకోండి’ అంటున్నాడు. శ‌ర్వా ఇలాంటి స్టేట్ మెంట్లు ఇవ్వ‌డం చాలా అరుదు.

శ్రీ‌రామ్ ఆదిత్య ద‌ర్శ‌క‌త్వంలో రూపొందిన సినిమా ఇది. కృతి శెట్టి క‌థానాయిక‌. ఈనెల 7న విడుద‌ల అవుతోంది. ఈ సినిమా ట్రైల‌ర్ లాంచ్ లో శ‌ర్వా చాలా కాన్ఫిడెన్స్‌గా క‌నిపించాడు. `”నా సినిమా వ‌చ్చి రెండేళ్ల‌య్యింది. కావాల‌నే నేనే ఆచి తూచి అడుగులేస్తున్నా. ఇక‌పై నా ప్ర‌తీ సినిమాకూ, ప్రేక్ష‌కుడు నాపై పెట్టే 150 రూపాయ‌ల‌కూ నాదే బాధ్య‌త‌. నాకు కాన్ఫిడెన్స్ వ‌స్తేనే సినిమా చేస్తా” అంటున్నాడు శ‌ర్వా. ఇటీవ‌లే ఫ‌స్ట్ కాపీ రెడీ అయ్యింది. కొంత‌మంది ఇండ‌స్ట్రీ ఫ్రెండ్స్‌కు కూడా చూపించాడు శ‌ర్వా. వాళ్ల ఫీడ్ బ్యాక్ చూసి శ‌ర్వాలో ఈ కాన్ఫిడెన్స్ పెరిగిందేమో. ఈ సినిమా ట్రైల‌ర్ రామ్ చ‌ర‌ణ్ చేతుల మీదుగా విడుద‌లైంది. ప్రీ రిలీజ్ ఈవెంట్ కూ చ‌ర‌ణ్ గెస్ట్ గా వ‌స్తాడ‌ని టాక్‌.