ప్ర‌భాస్ – మారుతి కాంబోలో ‘రాజాసాబ్‌’ రూపుదిద్దుకొంటున్న సంగ‌తి తెలిసిందే. ‘క‌ల్కి’ త‌ర‌వాత ప్ర‌భాస్ నుంచి రాబోయే సినిమా ఇది. పైగా వింటేజ్ ప్ర‌భాస్ ని చూపిస్తాన‌ని ముందే అభిమానుల‌కు ప్రామిస్ చేసేశాడు మారుతి. ప్ర‌భాస్ ని జోవియ‌ల్ గా చూసి కూడా చాలా కాల‌మైంది. అన్నిటికంటే ముఖ్యంగా ప్రభాస్ చేస్తున్న తొలి హార‌ర్ సినిమా ఇది. ప్ర‌భాస్ ఫ్యాన్స్ ఈ సినిమా గురించి ఎదురు చూడ‌డానికి ఇలా స‌వాల‌క్ష కార‌ణాలు, కోణాలూ ఉన్నాయి.

ఈ సినిమాని మ‌రింత స్పెష‌ల్ గా మార్చ‌డానికి మారుతి త‌న వంతు ప్ర‌య‌త్నం చేస్తూనే ఉన్నాడు. అందులో భాగంగా ఓ సూప‌ర్ హిట్ గీతాన్ని రీమిక్స్ చేయాల‌న్న ఆలోచ‌న‌లో ఉన్న‌ట్టు టాక్‌. 1980ల్లో సూప‌ర్ డూప‌ర్ హిట్ట‌యిన ఓ హిందీ పాట‌ని ఈ సినిమా కోసం వాడాల‌ని చూస్తున్నాడ‌ట‌. క‌థకు, స‌న్నివేశానికీ అనువుగా ఉండే పాట కోసం మారుతి అన్వేష‌ణ‌లో ప‌డ్డాడ‌ని తెలుస్తోంది. ఇటీవ‌ల చెన్నైలో సంగీత ద‌ర్శ‌కుడు త‌మ‌న్ తో మ్యూజిక్ సిట్టింగ్స్ జ‌రిగాయి. ఈ సంద‌ర్భంగా రీమిక్స్ గీతం గురించిన క‌స‌ర‌త్తు ప్రారంభ‌మైంద‌ని స‌మాచారం. ఈ పాట ఆల్బ‌మ్ మొత్తానికీ హైలెట్ గా, మంచి డాన్స్ నంబ‌ర్‌గా ఉండాల‌ని మారుతి భావిస్తున్నాడ‌ట‌. ఇందులో ముగ్గురు హీరోయిన్లు న‌టిస్తున్న సంగ‌తి తెలిసిందే. ఆ ముగ్గురు హీరోయిన్లూ ఈ పాట‌లోనే ప్ర‌భాస్ తో జ‌ట్టు క‌ట్టే అవ‌కాశాలు ఉన్నాయి. ఈ పాటేంటి? ఏ సంద‌ర్భంలో రానుంది? అనే విష‌యాల‌పై త్వ‌ర‌లోనే క్లారిటీ రానుంది. పీపుల్ మీడియా ఫ్యాక్ట‌రీ రూపొందిస్తున్న ఈ చిత్రం 2025 ప్ర‌ధ‌మార్థంలో ప్రేక్ష‌కుల ముందుకు రానుంది.