‘మెగా హీరో’ అనే ట్యాగ్ లైన్ మోయ‌డం అంత ఈజీ కాదు. వాళ్ల‌పై ఉండే అంచ‌నాల్ని ఎప్ప‌టిక‌ప్పుడు అందుకొంటూ ఉండాలి. అదెంత క‌ష్ట‌మో వైష్ణ‌వ్ తేజ్‌కు తొలి అడుగుల్లోనే అర్థ‌మైంది. ‘ఉప్పెన‌’తో డెబ్యూతోనే ఓ సూప‌ర్ హిట్ కొట్టేశాడు వైష్ణ‌వ్‌. అయితే ఆ త‌ర‌వాతే అస‌లైన క‌ష్టాలు మొద‌ల‌య్యాయి. వ‌రుస‌గా రెండు సినిమాలు ఫ్లాప్. ఓ సూప‌ర్ హిట్ త‌ర‌వాత‌, రెండు ఫ్లాపులు వ‌చ్చినా… కెరీర్‌కు పెద్ద ఇబ్బంది ఉండ‌దు. ‘ఉప్పెన‌’ మైలేజీ మ‌రో రెండు మూడు సినిమాల వ‌ర‌కూ ప‌నికొస్తుంది. కానీ వైష్ణ‌వ్ తేజ్ త‌దుప‌రి సినిమా ఇప్ప‌టి వ‌ర‌కూ ఏదీ మొద‌లు కాలేదు. మెగా హీరోల్లో ఖాళీగా ఉన్న‌ది వైష్ణ‌వ్ ఒక్క‌డే. యువ హీరోలు హిట్లూ, ఫ్లాపుల‌తో సంబంధం లేకుండా వ‌రుస‌గా సినిమాలు చేసేస్తున్నారు. కానీ వైష్ణ‌వ్ మాత్రం కొత్త క‌థ‌పై సంత‌కాలు చేయ‌డానికి త‌ట‌ప‌టాయిస్తున్నాడు.

Read Also: సైన్యంలో చేరాల‌నుకున్నా; వైష్ణ‌వ్ తేజ్ తో ఇంట‌ర్వ్యూ

అలాగ‌ని త‌న‌కు నిర్మాత‌లు లేర‌ని కాదు. ప్ర‌తీరోజూ ఓ నిర్మాతైనా వైష్ణ‌వ్‌ని క‌లుస్తున్నాడు. ద‌ర్శ‌కుడ్ని తీసుకెళ్లి క‌థ వినిపిస్తున్నాడు. కానీ వైష్ణ‌వ్ ఏదీ ఓకే చేయ‌డం లేదు. వ‌రుస‌గా రెండు పెద్ద ఫ్లాపులు త‌గ‌ల‌డంతో వైష్ణ‌వ్ ఇప్పుడు రిస్క్ చేసే పొజీష‌న్ లో లేడు. మంచి క‌థ వ‌స్తే త‌ప్ప `ఓకే` చెప్ప‌కూడ‌ద‌ని భీష్మించుకొని కూర్చున్నాడు. నిజానికి ఇది మంచి ప‌ద్ధ‌తే. కానీ వైష్ణ‌వ్ అయితే మ‌రీ అతి జాగ్ర‌త్త‌కు పోతున్నాడ‌ని తెలుస్తోంది. కొన్ని మంచి క‌థ‌లు, కొన్ని మంచి బ్యాన‌ర్ల ఆఫ‌ర్ల‌ని కూడా అతి జాగ్ర‌త్త‌తో ప‌క్క‌న పెట్టాడ‌ట‌. దానికి తోడు ‘వైష్ణ‌వ్ ద‌గ్గ‌ర‌కు వెళ్తే క‌థ‌లు ఓ ప‌ట్టాన తెవ‌ల‌వు’ అంటూ ఓ టాక్ బ‌య‌ట‌కు వ‌చ్చేసింది. వ‌రుణ్ తేజ్, సాయిధ‌ర‌మ్ తేజ్‌లు కూడా నిన్నా మొన్న‌టి వ‌ర‌కూ కొత్త క‌థ‌లు విన‌డానికీ, ఒప్పుకోవ‌డానికి పెద్ద‌గా ఇష్ట‌ప‌డలేదు. ఇప్పుడిప్పుడే వాళ్ల కొత్త సినిమాలు ఓ గాడిన ప‌డుతున్నాయి. మ‌రి వైష్ణ‌వ్ తేజ్ త‌దుప‌రి సినిమాకు మోక్షం ఎప్పుడో..?