దుల్క‌ర్ స‌ల్మాన్ తో వైజ‌యంతీ మూవీస్ అనుబంధం రోజు రోజుకీ బ‌ల‌ప‌డుతోంది. ‘మ‌హాన‌టి’, ‘సీతారామం’, ‘క‌ల్కి’… ఇలా వైజ‌యంతీ మూవీస్ తీసిన ప్ర‌తీ సినిమాలోనూ దుల్క‌ర్ ఉన్నాడు. ఇప్పుడు దుల్క‌ర్‌తోనే మ‌రో సినిమా ప్లాన్ చేశారు. ప‌వ‌న్ సాధినేని ద‌ర్శ‌క‌త్వంలో వైజ‌యంతీ మూవీస్ ఉప సంస్థ స్వ‌స్న సినిమాస్ ఓ చిత్రాన్ని నిర్మిస్తోంది. గీతా ఆర్ట్స్ నిర్మాణ భాగ‌స్వామి. సందీప్ గుణ్ణం, ర‌మ్య గుణ్ణం నిర్మాత‌లు. దుల్క‌ర్ స‌ల్మాన్ క‌థానాయ‌కుడు. ఈ చిత్రానికి ‘ఆకాశంలో ఒక తార’ అనే టైటిల్ ఖ‌రారు చేశారు. ‘సింహాస‌నం’లో సూప‌ర్ హిట్ గీతం ఇది. ఇప్పుడు టైటిల్ గా ఖాయం చేశారు. ఈ రోజు దుల్క‌ర్ లుక్ కూడా రివీల్ చేశారు. లుక్ చూస్తుంటే ఆయ‌న భ‌గ్న ప్రేమికుడిగా క‌నిపిస్తాడేమో అనిపిస్తోంది. పిరియాడిక్ ఫీలింగ్ వ‌చ్చింది. మ‌రి క‌థ‌ని ఎలా ముందుకు తీసుకెళ్తారో చూడాలి. క‌థానాయిక, ఇత‌ర వివ‌రాల్ని చిత్ర‌బృందం ఇంకా వెల్ల‌డించ‌లేదు. త్వ‌ర‌లోనే అన్ని వివ‌రాలూ బ‌య‌ట‌కు వ‌స్తాయి. దుల్క‌ర్ ప్ర‌స్తుతం ‘ల‌క్కీ భాస్క‌ర్‌’ సినిమాతో బిజీగా ఉన్నాడు. త్వ‌ర‌లోనే ఈ చిత్రం ప్రేక్ష‌కుల ముందుకు వ‌స్తుంది. తెలుగుతో పాటు మ‌ల‌యాళం, త‌మిళ, హిందీ భాష‌ల్లో ఈ చిత్రాన్ని విడుద‌ల చేస్తారు.
దుల్క‌ర్ టైటిల్: ‘ఆకాశంలో ఒక‌తార’
