ఢిల్లీ లిక్కర్ స్కామ్ లో ఆప్ కీలక నేత మనీష్ సిసోడియాకు బెయిల్ లభించడంతో బీఆర్ఎస్ లోనూ కొత్త ఆశలు చిగురిస్తున్నాయి. ఇదే కేసులో అరెస్ట్ అయి ఐదు నెలలుగా తీహార్ జైల్లోనే ఉండిపోయిన ఎమ్మెల్సీ కవితకు త్వరలోనే రెగ్యులర్ బెయిల్ లభిస్తుందన్న ఆశాభావం వ్యక్తం చేస్తున్నాయి బీఆర్ఎస్ వర్గాలు.

ఢిల్లీ లిక్కర్ పాలసీ రూపకల్పనలో అరవింద్ కేజ్రీవాల్ , మనీష్ సిసోడియాలు కీలకమని ఆరోపణలు ఎదుర్కొన్నారు. తాజాగా ఈ కేసులో సిసోడియాకు రెగ్యులర్ బెయిల్ మంజూరు కాగా.. ఈడీ కేసులో కేజ్రీవాల్ కు ఇప్పటికే బెయిల్ మంజూరు అయింది. సీబీఐ కేసులోనూ కేజ్రీవాల్ కు బెయిల్ లభిస్తే ఆయన కూడా బయటకు రానున్నారు.

Also Read : లిక్క‌ర్ స్కాంలో కీల‌క ప‌రిణామం… సిసోడియాకు బెయిల్

ఇక , ఈ కేసులో సౌత్ గ్రూప్ నుంచి కింగ్ పిన్ గా ఆరోపణలు ఎదుర్కొంటున్న కవిత బెయిల్ కోసం అనేక ప్రయత్నాలు చేస్తోంది. ఇప్పటికే ఆమెను బెయిల్ పై బయటకు తీసుకొచ్చేందుకు కేటీఆర్ , హరీష్ రావు సుప్రీంకోర్టు సీనియర్ లాయర్లతో వరుసగా సంప్రదింపులు జరుపుతున్నారు. లిక్కర్ కేసులో మనీష్ సిసోడియా తరఫున వాదించిన సీనియర్ న్యాయవాది అభిషేక్ సింఘ్వీ.. కవిత తరఫున వాదిస్తుండటం విశేషం.

మరోవైపు..మనీష్ సిసోడియా బెయిల్ పై వాదనల సందర్భంగా ఆరోప‌ణ‌ల‌తో ఓ వ్య‌క్తిని ఎక్కువ రోజులు జైల్లో పెట్ట‌లేమ‌ని, కింది కోర్టులు ఈ అంశాల‌ను ప‌ట్టించుకోవాల్సింద‌ని సుప్రీం ధర్మాసనం వ్యాఖ్యానించడంతో.. కవితకూ త్వరలోనే ఈ కేసులో బెయిల్ లభిస్తుందని బీఆర్ఎస్ ఆశాభావం వ్యక్తం చేస్తోంది.