‘ఆర్‌.ఆర్‌.ఆర్‌’ త‌ర‌వాత ఎన్టీఆర్ నుంచి ఒక్క సినిమా కూడా రాలేదు. ఈ విష‌యంలో తార‌క్ అభిమానులు చాలా నిరాశ‌లో ఉన్న‌మాట వాస్త‌వం. అయితే రాబోయే రెండేళ్ల‌లో ఎన్టీఆర్ నుంచి ఏకంగా 4 సినిమాలు రాబోతున్నాయి. ఇది ఎన్టీఆర్ ఫ్యాన్స్ కు కిక్ ఇచ్చే విష‌య‌మే. ఈ యేడాది ‘దేవ‌ర‌’ వ‌స్తోంది. ఈ సినిమాని రెండు భాగాలుగా విడుద‌ల చేస్తున్న సంగతి తెలిసిందే. పార్ట్ 2 వచ్చే యేడాది ప్రేక్ష‌కుల ముందుకు వ‌స్తుంది. ఈ రెండు సినిమాల‌కూ క‌నీసం 8 నెలల గ్యాప్ ఉంటుంది.

ఎన్టీఆర్ – ప్ర‌శాంత్ నీల్ కాంబోని శుక్ర‌వార‌మే క్లాప్ కొట్టారు. ఈ చిత్రాన్ని 2026 సంక్రాంతికి విడుద‌ల చేస్తామ‌ని ప్ర‌క‌టించేశారు కూడా. సో.. 2026 బెర్త్ ఖాయ‌మైన‌ట్టే. వీటి మ‌ధ్య ‘వార్ 2’ వ‌స్తుంది. 2025 చివ‌ర్లో ఈ చిత్రాన్ని విడుద‌ల చేయ‌డానికి స‌న్నాహాలు చేస్తున్నారు. హృతిక్ రోష‌న్‌, ఎన్టీఆర్ కాంబోలో రూపుదిద్దుకొంటున్న మ‌ల్టీస్టార‌ర్ చిత్ర‌మిది. ఇప్ప‌టికే ఎన్టీఆర్‌పై కొన్ని కీల‌క‌మైన స‌న్నివేశాలు తెర‌కెక్కించేశారు. 2025 ఎన్టీఆర్ ఫ్యాన్స్‌కు గుర్తుండిపోయే యేడాది అవ్వ‌బోతోంది. ఎందుకంటే 2025లో ఎన్టీఆర్ నుంచి 2 సినిమాలు వ‌స్తున్నాయి. ఈ రెండేళ్ల గ్యాప్ లో మొత్తంగా 4 సినిమాలు విడుద‌ల కాబోతున్నాయి. ‘ఆర్‌.ఆర్‌.ఆర్‌’ త‌ర‌వాత వ‌చ్చిన గ్యాప్ ని ఎన్టీఆర్ ఈ విధంగా భ‌ర్తీ చేస్తున్నాడ‌న్న‌మాట‌.