సూర్య ‘కంగువా’ ట్రైల‌ర్ సోమ‌వార‌మే ప్రేక్ష‌కుల ముందుకు వ‌చ్చింది. సినిమా విడుద‌ల‌కు ఇంకా రెండు నెల‌ల ముందే ట్రైల‌ర్ విడుద‌ల చేసేశారు. నిజానికి సినిమా రిలీజ్ కు వారం, ప‌ది రోజుల ముందే ట్రైల‌ర్ వ‌స్తుంది. కానీ.. ఈ విష‌యంలో ‘కంగువా’ టీమ్ ప్ర‌త్యేకంగా నిలిచింది. ‘కంగువా’ ట్రైల‌ర్ లో చూపించిన విజువ‌ల్స్ ఆకట్టుకొంటున్నాయి. యుద్ధ నేప‌థ్యంలో వ‌చ్చే స‌న్నివేశాల్ని ద‌ర్శ‌కుడు గ్రాండ్ లెవ‌ల్ లో తెర‌కెక్కించాడు. అయితే ఈ ట్రైల‌ర్‌లో చూపించింది కొంతే. దాచిన విష‌యాలు ఇంకా చాలానే ఉన్నాయ్‌.

రెండు ప్ర‌పంచాల నేప‌థ్యంలో సాగే క‌థ ఇది. ఇప్ప‌టికైతే ఒకే ప్ర‌పంచాన్ని ఆవిష్క‌రించారు. మ‌రి ఆ రెండో ప్ర‌పంచం ఏమిటి? ఎలా ఉండ‌బోతోంది? అనేది మ‌రింత ఆస‌క్తి క‌లిగిస్తోంది. తెలుగులో వ‌చ్చిన ‘బింబిసార‌’ ఛాయ‌లు ‘కంగువా’లో క‌నిపిస్తాయ‌ని ఇన్ సైడ్ వ‌ర్గాలు చెబుతున్నాయి. ‘బింబిసార‌’ టైమ్ మిష‌న్ లాంటి క‌థ‌. ఓ కాలంలోని హీరో, మ‌రో కాలానికి వెళ్తాడు. `కంగువా`లో కూడా ఆ ల‌క్ష‌ణాలు ఉంటాయ‌ని తెలుస్తోంది. గోవా నేప‌థ్యంలో సాగే ఎపిసోడ్స్ కొన్ని తెర‌కెక్కించారు. వాటిని ఇప్ప‌టి వ‌ర‌కూ చూపించ‌లేదు. దిశా ప‌టానీ ఈ సినిమాలో క‌థానాయిక‌గా న‌టిస్తోంది. ఆమె పాత్ర‌నీ గోప్యంగా ఉంచారు. సూర్య‌, బాబీ డియోల్ పాత్ర‌లకు మ‌రో వెర్ష‌న్ కూడా ఉంది. ఇప్ప‌టి వ‌ర‌కూ ఒకే గెట‌ప్‌లో వీళ్ల‌ని చూపించారు. రెండో గెట‌ప్ ఇంకా రివీల్ చేయ‌లేదు. అంతేకాదు, ఈ సినిమాలో స్పెష‌ల్ ఎప్పీరియ‌న్స్‌లు చాలానే ఉన్నాయ‌ట‌. చివ‌ర్లో కార్తిని క‌నీక‌నిపించ‌కుండా చూపించారు. అలాంటి గెస్ట్ రోల్స్ ఈ సినిమా నిండా వ‌స్తూనే ఉంటాయ‌ని స‌మాచారం అందుతోంది. సూర్య కెరీర్‌లోనే భారీ బ‌డ్జెట్ తో రూపొందించిన చిత్ర‌మిది. వ‌సూళ్లు కూడా అదే స్థాయిలో వ‌స్తాయ‌ని చిత్ర‌బృందం న‌మ్ముతోంది.