సుకుమార్ ద‌గ్గ‌ర ఓ మంచి అల‌వాటు ఉంది. త‌న శిష్యుల్ని బాగా ప్రోత్స‌హిస్తాడు. సుకుమార్ రైటింగ్స్ బ్యాన‌ర్‌లో వాళ్ల‌కు అవ‌కాశాలు ఇస్తాడు. ‘ఉప్పెన’తో బుచ్చిబాబు అలానే మెగాఫోన్ ప‌ట్టేశాడు. ఆ సినిమా సూప‌ర్ హిట్ అవ్వ‌డంతో ఏకంగా రామ్ చ‌ర‌ణ్‌తో సినిమా చేసే అవ‌కాశాన్ని అందుకొన్నాడు. ఇప్పుడు త‌న నుంచి మ‌రో ద‌ర్శ‌కుడు రాబోతున్నాడు. సుకుమార్ రైటింగ్స్ లో త‌న శిష్యుడితో ఓ సినిమా ప్లాన్ చేశాడు సుకుమార్. ఈ సినిమా పీపుల్ మీడియా ఫ్యాక్ట‌రీలో రూపుదిద్దుకోనుంది. దాదాపు రూ.150 కోట్ల బ‌డ్జెట్ తో రూపొందించే క‌థ ఇది. ఆ ద‌ర్శ‌కుడు ఎవ‌రు? జోన‌ర్ ఏమిట‌న్న విష‌యాలు త్వ‌ర‌లో తెలుస్తాయి.
సాధార‌ణంగా సుక్కు సినిమాలు ఎక్కువ‌గా మైత్రీ మూవీస్ లో రూపొందుతుంటాయి. కానీ తొలిసారి పీపుల్ మీడియా ఫ్యాక్ట‌రీలో సుకుమార్ వ‌ర్క్ చేయ‌డం విశేషం. సుకుమార్ శిష్యుల్లో చాలామంది క‌థ‌లు ప‌ట్టుకొని రెడీగా ఉన్నార‌ని, వాళ్లంద‌రి ప్రాజెక్టులు సుకుమార్ ఫైన‌ల్ చేసి, ఒక్కో బ్యాన‌ర్‌కి అప్ప‌గించే అవ‌కాశాలు ఉన్నాయ‌ని స‌మాచారం. సుకుమార్ రైటింగ్స్ నుంచి ఓ సినిమా వ‌స్తోందంటే ఆ క్రేజ్ మామూలుగా ఉండ‌దు. దానికి తోడు పెద్ద బ్యాన‌ర్లు యాడ్ అవుతున్నాయి. సుక్కు శిష్యుల‌కు ఇంత‌కంటే గొప్ప ఫ్లాట్ ఫామ్ ఏముంటుంది?
