ఎన్టీఆర్ డాన్స్ షో చూడ‌డానికి చాలా రోజుల నుంచి అభిమానులు త‌హ‌త‌హ‌లాడిపోతున్నారు. వాళ్లంద‌రి ఆక‌లి తీరేలా `దేవ‌ర‌` టీమ్… ఈరోజు మూడో పాట విడుద‌ల చేసింది. ‘దావూదీ’ అంటూ సాగిన ఈ పాట‌, అందులో ఎన్టీఆర్ వేసిన స్టెప్పులు ఆయ‌న అభిమానుల‌కు ఓ ట్రీట్ అని చెప్పాల్సిందే. ముఖ్యంగా రామ జోగ‌య్య శాస్త్రి రాసిన ఈ పాట‌లో ప‌దాలు చ‌క్క‌గా అమిరాయి.

”కొర‌మీనా నిన్ను
కోసుకుంటా ఇయ్యాలా
పోయిమీన‌
మ‌రిగిందె మ‌సాలా

నీ ఏట‌వాలు చూపే వెన్నెల సాంబ్రాణీ
న‌న్నెక్కించావే పిల్లా రెల్క‌ల గుర్రాన్నీ” అంటూ అచ్చం గుర్రంలా ప‌రుగులు పెట్టింది సాహిత్యం. శేఖర్ మాస్ట‌ర్ కంపోజ్ చేసిన డాన్స్ మూమెంట్స్ మాస్ కి న‌చ్చేలా ఉన్నాయి. ఎన్టీఆర్ కాస్ట్యూమ్స్ క్లాస్ గా క‌నిపించాయి. సిగ్నేచ‌ర్ స్టెప్పులేం లేక‌పోయినా… ఎన్టీఆర్‌లోని ఈజ్ మ‌రోసారి తెర‌పై క‌నిపించింది. జాన్వీ క‌పూర్ అందంగా ఉంది. త‌న‌లోని గ్లామ‌ర్ కోణం మ‌రోసారి చూపించింది. ఎన్టీఆర్ కి పోటీగా స్టెప్పులూ వేయ‌గ‌లిగింది. అనిరుథ్ ఇది వ‌ర‌కు ఈ సినిమా కోసం అందించిన రెండు పాట‌లూ కాస్త మెల్ల‌గా శ్రోత‌ల్లోకి వెళ్లాయి. అయితే ఇది మాస్ పాట కాబ‌ట్టి ఇన్‌స్టెంట్ గా ఎక్కేసే అవ‌కాశం ఉంది. కొర‌టాల శివ ద‌ర్శ‌క‌త్వంలో రూపొందిన ఈ చిత్రం ఈనెల 27న ప్రేక్ష‌కుల ముందుకు రానున్న సంగతి తెలిసిందే.