అఖిల్ త‌దుప‌రి సినిమా బొమ్మ‌రిల్లు భాస్క‌ర్‌తో అని ప్ర‌చారం గ‌ట్టిగా సాగుతోంది. ఇప్పుడు అదే ఫిక్స‌య్యింది. అఖిల్ – బొమ్మ‌రిల్లు భాస్క‌ర్‌తో గీతా ఆర్ట్స్ 2 ఓ చిత్రాన్ని నిర్మిస్తోంది. ఈ విష‌యాన్ని నిర్మాణ సంస్థ కూడా అధికారికంగా ప్ర‌క‌టించేసింది. వేస‌విలో చిత్రీక‌ర‌ణ ప్రారంభిస్తారు. బొమ్మ‌రిల్లు త‌ర‌హాలోనే ఇదో కుటుంబ క‌థా చిత్ర‌మ‌ని తేలింది. ఈ చిత్రానికి గోపీ సుంద‌ర్ సంగీతం అందించ‌నున్నారు. బ‌న్నీ వాసు నిర్మాత‌గా వ్య‌హ‌రిస్తారు. స్క్రిప్టు ప‌నులు ఓ కొలిక్కి వ‌స్తున్నాయి. త్వ‌ర‌లోనే క‌థానాయిక‌, ఇత‌ర సాంకేతిక నిపుణుల వివ‌రాలు తెలియ‌జేస్తారు. `బొమ్మ‌రిల్లు`తో టాలీవుడ్‌లో అడుగుపెట్టాడు భాస్క‌ర్‌. ఆ సినిమా సూప‌ర్ డూప‌ర్ హిట్ అయ్యింది. ప‌రుగు ఓకే అనిపించుకుంది. అయితే ఆ త‌ర‌వాత వ‌చ్చిన ఆరెంజ్‌, ఒంగోలు గిత్త చిత్రాలు పూర్తిగా నిరాశ ప‌రిచాయి. అయితే గ‌త కొంత‌కాలంగా భాస్క‌ర్ గీతా ఆర్ట్స్ చుట్టూ తిరుగున్నాడు. ఆ ప్ర‌య‌త్నాలు ఇలా ఫ‌లించాయి.