ఈనెల 15న ‘డ‌బుల్ ఇస్మార్ట్’ విడుద‌ల‌కు సిద్ధ‌మైంది. పూరి స్టైల్ లో సాగే మాస్ మ‌సాలా సినిమా ఇద‌ని ప్ర‌చార చిత్రాలు చెప్ప‌క‌నే చెబుతున్నాయి. రామ్ ఎన‌ర్జీ ఈ ట్రైల‌ర్ లో ప్ర‌ధాన ఆక‌ర్ష‌ణ‌గా నిలిచింది. సంజ‌య్ ద‌త్ అండ దండ‌గా ఉన్నాడు. బాలీవుడ్ లో ‘డ‌బుల్ ఇస్మార్ట్‌’ హ‌వా చూపించ‌డానికి సంజూ భాయ్ ఆస‌రా త‌ప్ప‌ని స‌రి. అలీ గెట‌ప్ కొత్త‌గా క‌నిపిస్తోంది. పూరి సినిమాల్లో అలీ కామెడీ ట్రాకుల‌కు మంచి పేరొచ్చింది. కొన్ని సార్లు క‌థ‌తో సంబంధం లేక‌పోయినా, ఆ ట్రాకులు భ‌లే న‌వ్వించాయి. ‘డ‌బుల్ ఇస్మార్ట్`లోనూ త‌న ట్రాక్ బాగా పేలింద‌ని ఇన్ సైడ్ వ‌ర్గాలు చెబుతున్నాయి. అయితే ఈ ట్రాక్ ఆలోచ‌న ముందు లేద‌ట‌. సినిమా అంతా పూర్త‌యిన త‌ర‌వాత అలీ ఉండుంటే బాగుంటుంద‌ని భావించిన పూరి, అప్ప‌టి క‌ప్పుడు ఈ ట్రాక్ రాసుకొన్నాడ‌ని తెలుస్తోంది. పూరి ఇది వ‌ర‌కు కూడా ఇలానే చేశాడు. ‘దేశ‌ముదురు’ స్క్రిప్టులో అలీ లేడు. చివ‌ర్లో త‌న పాత్ర‌ని యాడ్ చేయాల్సివ‌చ్చింది. కానీ ఆ పాత్ర‌కు మంచి పేరొచ్చింది. ఇప్పుడూ అలానే జ‌రుగుతుంద‌న్న‌ది టీమ్ న‌మ్మ‌కం.

Read Also : డబుల్ ఇస్మార్ట్ గల్లీ సినిమా: పూరి

అలీని ఓ గ్ర‌హంత‌ర వాసిలా చూపించ‌బోతున్నార‌ని, త‌న మాట‌లు, చేష్ట‌లు న‌వ్విస్తాయ‌ని పూరి స‌న్నిహితులు చెబుతున్నారు. ఈ ట్రాక్ కీ క‌థ‌కూ సంబంధం ఉండ‌దు. కానీ.. మాంచి యాక్ష‌న్ మూడ్ లో సాగిపోతున్న సినిమాకు అలీ కాస్త ఉప‌శ‌మ‌నం క‌లిగిస్తాడ‌ని, థియేట‌ర్ మూడ్ ని మారుస్తాడ‌ని చెబుతున్నారు. ఈమ‌ధ్య పెద్ద సినిమాల్లో అలీకి స‌రైన పాత్ర‌లు ప‌డ‌డం లేదు. చిన్న సినిమాల‌కు ఆయ‌న్ని ఎలా వాడుకోవాలో తెలియ‌డం లేదు. అలీ కూడా ఆద్యంతం న‌వ్వించి చాలా కాల‌మైంది. ఆ లోటు ‘డ‌బుల్ ఇస్మార్ట్’ తీరుస్తాడేమో చూడాలి.