అల్లరి నరేష్ కెరీర్ లో హిట్ సినిమా ‘సుడిగాడు’. స్పూఫ్ లకు పరాకాష్టగా వచ్చిన ఆ సినిమా బాగానే నవ్వించింది. తర్వాత నరేష్ కి వరుస పరాజయాలు వచ్చాయి. ఏ సినిమా చేసిన ‘సుడిగాడు’తో పోలిక తెచ్చారు. అది వేరే సంగతి. ఈ సినిమాకి కొనసాగింపుగా ఇప్పుడు ‘సుడిగాడు 2’ ని స్వయంగా రాస్తున్నారు నరేష్. ఈ విషయాన్ని ఆయనే స్వయంగా చెప్పారు.
‘సుడిగాడు ని బాలీవుడ్ లో కొందరు తప్పుగా అర్ధం చేసుకున్నారు. ఇది స్పూఫ్ సినిమా. అయితే సౌత్ సినిమాలన్నీ ఇలానే ఉంటాయో అనుకున్నారు. ఈమధ్య ఒక ఆలోచన వచ్చింది. బాలీవుడ్ సినిమాలని కూడా తీసుకొని సుడిగాడు లాంటి కథ చేస్తే అప్పుడు అక్కడి ఆడియన్స్ కి కూడా క్లియర్ గా అర్ధమౌతుంది. ఈ ఐడియా రాయడం మొదలుపెట్టా’ అని చెప్పుకొచ్చారు నరేష్.
అలాగే తనకి జోకర్ లాంటి పాత్ర చేయాలని వుందని చెప్పారు. మనం నవ్వితే ప్రేక్షకులు భయపడే పాత్రలో కనిపించాలి. అలాగే వెంకటేష్ గారితో కలసి ఒక సినిమా చేయాలనివుందని, పుష్పక విమానం తన ఫేవరేట్ అని చెప్పిన నరేష్ అలాంటి మూకీ సినిమా భవిష్యత్ లో తప్పకుండా చేస్తానని తన భవిష్యత్ ప్రణాళిక గురించి చెప్పుకొచ్చారు.
