ఎఫ్ 3తో.. త‌న విజ‌య యాత్ర‌ని దిగ్విజ‌యంగా కొన‌సాగించాడు అనిల్ రావిపూడి. ఇప్పుడు త‌న దృష్టంతా బాల‌కృష్ణ సినిమాపైనే ఉంది. అనిల్ రావిపూడితో బాల‌య్య సినిమా ఓకే అయిన సంగ‌తి తెలిసిందే. ప్ర‌స్తుతం గోపీచంద్ మ‌లినేని తో ఓ సినిమా చేస్తున్నాడు బాల‌య్య. అది అవ్వ‌గానే అనిల్ రావిపూడి సినిమా మొద‌లెట్టేస్తారు. దానికి ఇంకొంచెం స‌మ‌యం ఉంది. అందుకే స్క్రిప్టు ని కాస్త బిగించి రాయ‌డానికి అనిల్ రావిపూడికి ఇంకాస్త టైమ్ దొరికింది. ప్ర‌స్తుతం అనిల్ రావిపూడి వైజాగ్‌లో ఉన్నారు. ఆయ‌న బాల‌య్య సినిమాకి సంబంధించిన ఫ‌స్టాఫ్ ని పూర్తి చేశారు. బాల‌య్య‌కు డైలాగ్ వెర్ష‌న్‌తో స‌హా వినిపించి – ఫ‌స్టాఫ్‌ని లాక్ చేసేశాడు అనిల్ రావిపూడి, ఈనెలాఖ‌రుకి సెకండాఫ్‌కి కూడా లాక్ చేసి, ఆ త‌ర‌వాత న‌టీన‌టులు, ఇత‌ర టెక్నీషియ‌న్స్ ని ఫైన‌ల్ చేసుకుంటారు.
అనిల్ రావిపూడి ఇప్ప‌టి వ‌ర‌కూ ఎంట‌ర్‌టైన్‌మెంట్ సినిమాలే తీశాడు. తొలిసారి పూర్తి యాక్ష‌న్ డ్రామా చేయ‌బోతున్నాడు. ఈ క‌థ‌లో ఎంట‌ర్‌టైన్‌మెంట్ కి స్కోప్ చాలా త‌క్కువ. అంటే… దాదాపుగా త‌న‌ది కాని జోన‌ర్‌ని ట్రై చేస్తున్న‌ట్టే. ప‌టాస్‌, సుప్రీమ్‌, రాజా ది గ్రేట్ సినిమాల్లో యాక్ష‌న్ సీన్లు బాగానే డీల్ చేశాడు అనిల్ రావిపూడి. అయితే… త‌న సినిమా అన‌గానే ఫ‌న్ మాత్ర‌మే గుర్తొస్తుంది. ఈసారి మాత్రం త‌న‌లో యాక్ష‌న్ ఏస్థాయిలో ఉందో చూపించే ఛాన్స్ దొరికింది. పైగా బాల‌య్య హీరో. మ‌రి అనిల్ రావిపూడి త‌న‌ని తాను ఇంకెంత కొత్త‌గా ఆవిష్క‌రించుకొంటాడో చూడాలి.
