సందీప్ రెడ్డి వంగాది డిఫ‌రెంట్ స్టైల్‌. హిట్ వ‌చ్చింది క‌దా అని ప‌రుగులు పెట్ట‌డు. లేదంటే అర్జున్ రెడ్డి త‌ర‌వాత తెలుగులో ఈపాటికి రెండు మూడు సినిమాలు చేసేసేవాడు. కానీ తన‌కు న‌చ్చిన దారిలోనే వెళ్తున్నాడు. త‌న కొత్త సినిమా యానిమ‌ల్ ఇప్పుడు విడుద‌ల‌కు రెడీగా ఉంది. ఈ సినిమా ర‌న్ టైమ్ దాదాపు మూడున్న‌ర గంట‌లు. ఈరోజుల్లో రెండున్న‌ర గంట‌ల సినిమా అంటేనే `వామ్మో` అంటున్నారు. అలాంటిది మూడున్న‌ర గంట‌లంటే మాట‌లా? సినిమా నిడివి త‌గ్గించ‌మ‌ని ఎవ‌రు ఎన్ని చెప్పినా… సందీప్ విన‌డం లేదు. నిడివి త‌గ్గించ‌నే త‌గ్గించ‌ను.. అంటున్నాడు. చివ‌రికి పావు గంట క‌త్తిరించి మూడు గంట‌ల 15 నిమిషాలుగా ర‌న్ టైమ్ ఫిక్స్ చేశారు. అర్జున్ రెడ్డి సినిమా కూడా ఇంతే. నిడివి ప‌రంగా అర్జున్ రెడ్డి సుదీర్ఘ‌మైన సినిమానే. నిజానికి ఈరోజుల్లో ఇంతింత ఫుటేజీ ఉంటే.. దాన్ని ఇంకాస్త పెంచి, రెండు భాగాలుగా తీస్తుంటారు. ఆ ఐడియా చిత్ర‌బృందానికి కూడా వ‌చ్చింది. తొలి భాగానికి కామా పెట్ట‌డానికి స‌రైన ప్లేస్ మెంట్ దొర‌క‌లేద‌ట‌. అందుకే… ఈ సినిమాని ఒకే భాగంగా విడుద‌ల చేస్తున్నారు. ఇప్ప‌టికే విడుద‌లైన పాట‌లు, ప్ర‌చార చిత్రాలు ఈ సినిమాపై మ‌రింత అంచ‌నాలు పెంచేశాయి. ఈ సినిమా కోసం పాన్ ఇండియా స్థాయిలో ప్రేక్ష‌కులు ఆస‌క్తిగా ఎదురు చూస్తున్నారు.