నందమూరి బాలకృష్ణ హోస్ట్ గా ఆహాలో ప్రసారమయ్యే ‘అన్‌స్టాపబుల్‌ ‘షో లో పవన్ కల్యాణ్‌తో చేసిన ఎపిసోడ్ ప్రస్తుతం స్ట్రీమింగ్‌ అవుతోంది. ఈ ఎపిసోడ్ లో గతంలో తనకు యాక్సిడెంట్‌ జరిగిన విషయం గురించి బాలకృష్ణ వివరించారు. ఈ సందర్భంగా నర్సుల గురించి ఆయన చేసిన వ్యాఖ్యలు వివాదమయ్యారు. కాగా దీనిపై బాలకృష్ణ వివరణ ఇచ్చారు.
‘’నర్సులను కించపరిచానంటూ కొందరు చేస్తున్న అసత్య ప్రచారాన్ని తీవ్రంగా ఖండిస్తున్నాను. నా మాటలను కావాలనే వక్రీకరించారు. రోగులకు సేవలందించే నా సోదరీమణులంటే నాకెంతో గౌరవం. బసవతారకం కేన్సర్ ఆస్పత్రిలో నర్సుల సేవలను ప్రత్యక్షంగా చూశాను. రాత్రింబవళ్లు రోగులకు సపర్యలు చేసి ప్రాణాలు నిలిపే నా సోదరీమణులంటే నాకెంతో గౌరవం. వారికి ఎన్నిసార్లు కృతజ్ఞతలు చెప్పినా తక్కువే. అటువంటి నర్సులను మనం మెచ్చుకొని తీరాలి. నిజంగా నా మాటలు మీ మనోభావాలు దెబ్బతీస్తే పశ్చాత్తాపం వ్యక్తం చేస్తున్నాను’’ తెలిపారు బాలకృష్ణ.
