రేపు జూన్ 10… అంటే బాల‌య్య పుట్టిన‌రోజు. హిందూపురం నుంచి ఎం.ఎల్‌.ఏగా హ్యాట్రిక్ కొట్టిన త‌ర‌వాత వ‌చ్చిన పుట్టిన రోజుది. అందుకే అభిమానుల హ‌డావుడి మ‌రింత ఎక్కువైంది. ‘కాబోయే మంత్రి బాల‌య్య’ అనే ఆనందంతో ఈసారి పుట్టిన రోజు పండ‌గ చేసుకోబోతున్నారు ఫ్యాన్స్‌. ఈసారి మంత్రి వ‌ర్గంలో బాల‌య్య పేరు వినిపించ‌డం ఖాయ‌మ‌న్న‌ది అభిమానుల ఆశ.
ఈ సంద‌ర్భంగా బాల‌కృష్ణ కొత్త సినిమా టైటిల్ కూడా రేపే బ‌య‌ట‌కు రానుంది. బాబి దర్శ‌క‌త్వంలో బాల‌కృష్ణ ఓ సినిమా చేస్తున్న సంగతి తెలిసిందే. ఎల‌క్ష‌న్ల హ‌డావుడి వ‌ల్ల ఈ సినిమాకు బ్రేక్ వ‌చ్చింది. త్వ‌ర‌లోనే మ‌ళ్లీ రెగ్యుల‌ర్ షూటింగ్ మొద‌లు కాబోతోంది. ఈ చిత్రానికి సంబంధించిన టైటిల్ రేపు 11 గంట‌ల 27 నిమిషాల‌కు అధికారికంగా ప్ర‌క‌టిస్తారు. `వీర మాస్‌` అనే టైటిల్ ప్ర‌చారంలో ఉంది. ఇప్పుడు అదే ఖాయ‌మైన‌ట్టు తెలుస్తోంది. త‌మ‌న్ ఈ చిత్రానికి సంగీతాన్ని స‌మ‌కూరుస్తున్నారు. బాల‌కృష్ణ – బోయ‌పాటి కాంబోలో ‘అఖండ 2’కు సంబంధించిన ప్ర‌క‌ట‌న కూడా రేపు అధికారికంగా బ‌య‌ట‌కు వచ్చే అవ‌కాశాలు క‌నిపిస్తున్నాయి.
