ఆమ‌ధ్య హుద్ హుద్ బాధితుల కోసం తెలుగు చిత్ర‌సీమ మేము సైతం అంటూ ఓ కార్య‌క్ర‌మాన్ని నిర్వ‌హించింది.. ఫండ్ రైజింగ్ కోసం. ఆ స‌మ‌యంలో నంద‌మూరి బాల‌కృష్ణ వేదిక‌పై ఓ పాట పాడి అంద‌రికీ షాక్ ఇచ్చాడు. ‘చ‌లాకీ చూపుల్తోనే మ‌త్తెక్కించావే…ష‌రాబీ న‌వ్వుల‌తోనే మ‌తి పోగొట్టావే’ అంటూ ప్రొఫెష‌న‌ల్ గాయ‌కుడిలా రెచ్చిపోయాడు. పాడ‌డ‌మంటే రెండు మూడు లైన్లు పాడేసి మ‌మ అనిపించ‌డం లేదు. సాకీతో స‌హ… ఏదీ వ‌ద‌ల్లేదు. బాల‌య్య‌లో ఇంత టాలెంట్ ఉందా అంటూ చిత్ర‌సీమ కూడా ఆశ్చ‌ర్య‌ప‌యింది. ఇప్పుడు ఆ టాలెంట్‌ని పూర్తిగా పిండేసుకొన్నాడు పూరి జగన్నాథ్.
బాల‌కృష్ణ -పూరి జగన్నాథ్ కాంబినేష‌న్‌లో ఓ చిత్రం తెర‌కెక్కుతున్న సంగ‌తి తెలిసిందే. ఈ సినిమాకి ఓ స‌రికొత్త ఎట్రాక్ష‌న్ తోడైంది. ఈ సినిమా కోసం బాల‌య్య‌తో ఓ పాట పాడించేశాడు పూరి. భాస్క‌ర‌భ‌ట్ల రాసిన ఈ పాట‌ని ఇటీవ‌లే రికార్డ్ కూడా చేసేశారు. బాల‌య్య పాట అభిమానుల్ని అల‌రించ‌డం ఖాయ‌మ‌ని చిత్ర‌బృందం ధీమాగా చెబుతోంది. ఇలాంటి ఆక‌ర్ష‌ణీయాంశాలు రెండు మూడు క‌లిస్తే.. ఈ సినిమా రేంజ్ మ‌రింత పెరిగిపోవ‌డం ఖాయం. బాల‌య్య‌లోని గాయ‌కుడు ఏ స్థాయిలో రెచ్చిపోయాడో తెలియాలంటే.. ఇంకొన్ని రోజులు ఆగాలి.
