నేచుర‌ల్ స్టార్ నానిని ఓ కొత్త పాత్ర‌లో చూడ‌బోతున్నారు టీవీ ప్రేక్ష‌కులు. ‘బిగ్ బాస్ 2’కి నాని హోస్ట్‌గా వ్య‌వ‌హ‌రించ‌బోతున్నాడు. ఈనెల 10న క‌ర్టెన్ రైజ‌ర్ కార్య‌క్ర‌మంతో `బిగ్ బాస్ 2`కి శ్రీ‌కారం చుట్టేస్తారు. నాని మంచి మాట‌కారి. ఆడియో ఫంక్ష‌న్ల‌లో త‌న స్పీచులు వింటే, త‌న ఇంట‌ర్వ్యూలు చూస్తే ఆ విష‌యం అర్థ‌మైపోతుంది. ఐఫా వేడుక‌కు నాని హోస్ట్‌గా వ్య‌వ‌హ‌రించి ఆ కార్య‌క్ర‌మాన్ని ర‌క్తి క‌ట్టించాడు. కాక‌పోతే.. `బిగ్ బాస్` వేరు. వారం వారం ఈ షోని నిల‌బెట్టాల్సిన బాధ్య‌త నానిదే. సెల‌బ్రెటీల మ‌న‌స్త‌త్వాన్ని, వాళ్లు ఆడుతున్న విధానాన్ని క్షుణ్ణంగా అర్థం చేసుకుని యాంక‌రింగ్ చేయాల్సి ఉంటుంది. దానికి తోడు.. బిగ్ బాస్ 1ని ఎన్టీఆర్ హోస్ట్ చేశాడు. ఆ షోని.. విజ‌య‌వంతంగా న‌డిపించాడు. ఎన్టీఆర్ ని చూసిన క‌ళ్ల‌తో మ‌రొక‌ర్ని చూడాలంటే ఇబ్బందే. ఎంత బాగా చేసినా ‘ఎన్టీఆర్‌లా చేయ‌లేక‌పోతున్నాడు’ అనే అప‌వాదు మూట‌గ‌ట్టుకోవాల్సి ఉంటుంది. ఎన్టీఆర్‌ని దాటి.. ఈ షోని మోయ‌డం.. నానికి త‌ల‌కు మించిన భార‌మే. పైగా టీవీ షోల్ని న‌డిపించ‌డం నానికి బొత్తిగా కొత్త‌. అయినా ఫ‌ర్వాలేదు. నానికి మాట‌ల‌తో మెస్మ‌రైజ్ చేయ‌డం బాగా తెలుసు. ఎన్టీఆర్ కూడా తొలి ఒక‌ట్రెండు షోల‌లో కాస్త కంగారు ప‌డిన‌ట్టు క‌నిపించింది. మెల్ల‌మెల్ల‌గా విజృంభించాడు. నాని కూడా అల‌వాటు ప‌డితే… ‘బిగ్ బాస్ 2’ని స‌మ‌ర్థవంతంగా న‌డిపించ‌డ‌ల‌డు. మ‌రి.. నాని ఏ మేర‌కు ఈ షోని మెప్పిస్తాడో, కొత్త పాత్ర‌లో ఏ మేర‌కు ఒరిగిపోతాడో చూడాలి.