‘పూజా.. కాజా… ‘ అంటూ ఈమ‌ధ్య దిల్ రాజు సైతం పూజా హెగ్డేని ఆకాశానికి ఎత్తేశాడు. పూజా కెరీర్ అలా ఉంది. పూజా అడుగుపెడితే చాలు సినిమా హిట్ట‌ని దిల్ రాజు మైకు ప‌ట్టుకుని మ‌రీ చెప్పేశారు. దాన్ని బ‌ట్టి… పూజాపై దిల్ రాజుకి ఎంత న‌మ్మ‌క‌మో అర్థం చేసుకోవ‌చ్చు. ఇప్పుడు ఆ సెంటిమెంట్ తోనే.. ‘ఎఫ్ 3’లో పూజా కు చోటిచ్చారేమో అనిపిస్తోంది. అనిల్ రావిపూడి ద‌ర్శ‌క‌త్వం వ‌హిస్తున్న చిత్రం.. ఎఫ్ 3. వెంక‌టేష్‌, వ‌రుణ్ తేజ్‌లు హీరోలు. ఈ సినిమాలో పూజా ఐటెమ్ సాంగ్ చేస్తోంది. శుక్ర‌వారం నుంచి హైద‌రాబాద్ లో ఈ పాట‌ని తెర‌కెక్కించ‌డం మొద‌లెట్టారు. ఈ పాట‌లో.. వెంకీ, వ‌రుణ్‌, త‌మ‌న్నా, మెహ‌రీన్ లు కూడా క‌నిపిస్తారు. నిజానికి ఈ సినిమాలో ఓ ఐటెమ్ పాట పెట్టాల‌న్న ఆలోచ‌న ముందు ఎవ్వ‌రికీ లేదు. సినిమా అంతా అయిపోయాక‌.. ఈ ఐడియా వ‌చ్చింది. అందుకే… పూజాని రంగంలోకి దింపారు. ఆ మాట‌కొస్తే… ఈ సినిమా ఇప్ప‌టికే గ్లామ‌ర్ భామ‌లో నిండిపోయింది. త‌మ‌న్నా, మెహ‌రీన్‌ల‌తో పాటు ఇందులో సోనాల్ చౌహాన్ కూడా ఓ కీల‌క పాత్ర పోషిస్తున్న సంగ‌తి తెలిసిందే. అంటే ముగ్గురు హీరోయిన్ల‌న్న‌మాట‌. అయినా కొత్త‌గా గ్లామ‌ర్ యాడ్ చేయాల్సిన అవ‌స‌రం వ‌చ్చిందంటే… అదంతా పూజా పై ఉన్న సెంటిమెంట్ వ‌ల్లే. కాక‌పోతే.. ఒక్క‌టే తేడా కొడుతోంది. ఈమ‌ధ్య పూజా చేసిన రాధేశ్యామ్ బోల్తా కొట్టింది. మొన్న‌టికి మొన్న ‘బీస్ట్’ కూడా తేడా చేసింది. అయినా స‌రే, పూజా ఉంటే సినిమా హిట్టేన‌ని దిల్ రాజు ఇంకా గ‌ట్టిగా న‌మ్ముతున్నారంటే, ఆ సెంటిమెంట్ కోసం పూజాకి కోటిన్న‌ర వ‌ర‌కూ పారితోషికం ఇవ్వ‌డానికి రెడీ అయ్యారంటే.. గ్రేటే.