ఫ‌రియా అబ్దుల్లా… ‘జాతిర‌త్నాలు’తో మెరిసిన క‌థానాయిక. చ‌క్క‌టి ప్ర‌తిభావంతురాలు. అయితే స‌రైన అవ‌కాశాలే రావ‌డం లేదు. ఇప్పుడు ‘మ‌త్తు వ‌ద‌ల‌రా 2’లో మ‌ళ్లీ తెర‌పై మెర‌వ‌బోతోంది. ఈ సినిమా ఫ‌రియాకు చాలా స్పెష‌ల్. ఎందుకంటే ఈ సినిమాలో ఫ‌రియా ఓ పాట రాసి, పాడి, కొరియోగ్ర‌ఫీ కూడా చేసింది. ఓ క‌థానాయికకు ఇన్ని క‌ళ‌ల్లో ప్ర‌వేశం ఉండడం, దాన్ని ప్ర‌ద‌ర్శించేందుకు ఓ వేదిక దొర‌క‌డం నిజంగా అదృష్ట‌మే. త్వ‌ర‌లోనే ఈ పాట‌ని విడుద‌ల చేయ‌బోతున్నారు. ఇందులో ఫ‌రియా ఓ సీక్రెట్ ఏజెంట్ గా క‌నిపించ‌నుంది. త‌న‌తో యాక్ష‌న్ సీన్లూ చేయించార్ట ద‌ర్శ‌కుడు. మొత్తానికి త‌న ఆల్ రౌండ్ ప్ర‌తిభ ఈ సినిమాతో ఫ‌రియా చూపించ‌బోతోంద‌న్న‌మాట.
2019లో విడుద‌లైన సినిమా ‘మ‌త్తు వ‌ద‌ల‌రా’. సింహా కోడూరి, స‌త్య ప్ర‌ధాన పాత్ర‌లు పోషించిన ఈ సినిమా చ‌క్క‌టి వినోదాన్ని పంచింది. ఇప్పుడు సీక్వెల్ రెడీ అయ్యింది. సెప్టెంబరు 13న ఈ సినిమా విడుద‌ల కాబోతోంది. రితీష్ రానా ద‌ర్శ‌క‌త్వం వ‌హించారు. మైత్రీ మూవీస్ సంస్థ నిర్మించింది. సెప్టెంబ‌రులో పెద్ద సినిమాల హ‌డావుడి లేదు. బాక్సాఫీసు కాస్త ఖాళీగా ఉంది. అందుకే స‌డ‌న్‌గా ఈ సినిమాని దించేస్తోంది మైత్రీ మూవీస్. టీజ‌ర్ ఆస‌క్తిక‌రంగానే ఉంది. అందులో బోలెడంత మీమ్ కంటెంట్ క‌నిపించింది. కాంట్ర‌వ‌ర్సీకి ఛాన్సుండే విష‌యాలు కూడా ఈ టీజ‌ర్‌లో చాలానే ఉన్నాయి. అవ‌న్నీ ఈ సినిమాకు ఫ్రీ ప‌బ్లిసిటీ తీసుకొచ్చే ఛాన్సుంది.
