అక్టోబ‌రు 15 నుంచి థియేట‌ర్లు తెర‌చుకుంటున్నాయి. అయినా నిర్మాత‌ల‌లో ఉత్సాహం లేదు. ఎప్ప‌టిలా థియేట‌ర్లకు జ‌నం వ‌స్తారా, రారా? అనే భ‌యాలు వెంటాడుతున్నాయి. అక్టోబ‌రు 15న థియేట‌ర్లు తెర‌చుకున్నా, కొత్త సినిమాలేవీ రావ‌ని విశ్లేష‌కులు తేల్చేస్తున్నారు. అయితే…. వ‌ర్మ నుంచి తొలి అడుగు ప‌డ‌బోతోంది. అక్టోబ‌రు 15నే త‌న సినిమాని విడుద‌ల చేయ‌డానికి వ‌ర్మ రెడీ అయిపోయాడు. లాక్ డౌన్ స‌మ‌యంలో చాలా సినిమాలు తీసేసి ప‌క్క‌న పెట్టుకున్నాడు వ‌ర్మ‌. అందులో `క‌రోనా వైర‌స్‌` ఒక‌టి. ఈ సినిమాకి అక్టోబ‌రు 15న విడుద‌ల చేస్తున్న‌ట్టు వ‌ర్మ ప్ర‌క‌టించాడు. లాక్ డౌన్ త‌ర‌వాత‌.. విడుద‌ల అవుతున్న తొలి సినిమా ఇదే. పైగా ఇదీ క‌రోనా నేప‌థ్యంలో సాగే సినిమానే. మొత్తానికి వ‌ర్మ నుంచి తొలి అడుగు ప‌డ‌బోతోంది. మిగిలిన వాళ్లు వ‌ర్మ‌ని అనుస‌రిస్తారా, అనుక‌రిస్తారా.. ఆగి ఆలోచిస్తారా అన్న‌దే తేలాలి.