ఒక చెంప మీద కొడితే… రెండు చెంప‌లూ వాయించేయాల్సిందే. లేక‌పోతే అస‌మ‌ర్థులుగా మిగిలిపోతాం. ఓ రాక్ష‌సుడ్ని సంహ‌రించ‌డానికి దేవుడైనా బ్ర‌హ్మ రాక్ష‌సుడి అవ‌తారం ఎత్తాల్సిందే. ‘భీమా’ క‌థ కూడా అలాంటిదే అనిపిస్తోంది. గోపీచంద్ క‌థానాయ‌కుడిగా నటిస్తున్న తాజా చిత్రం ‘భీమా’. హ‌ర్ష ద‌ర్శ‌క‌త్వం వ‌హిస్తున్నాడు. రాధామోహ‌న్ నిర్మాత‌. ప్రియా భ‌వానీ శంక‌ర్‌, మాళ‌విక శ‌ర్మ క‌థానాయిక‌లు. ఈరోజు టీజ‌ర్ విడుద‌ల చేశారు.

భ‌గ‌వ‌ద్గీత శ్లోకంతో… టీజ‌ర్ మొద‌లైంది. ర‌విశంక‌ర్ బేస్ వాయిస్ తో టీజ‌ర్ మొద‌లు కాగానే పూన‌కాలు మొద‌లైపోతాయి. ఆ త‌ర‌వాత హీరో ఎంట్రీ ఇచ్చాడు. రాక్ష‌సుల్ని సంహ‌రించ‌డానికి బ్ర‌హ్మరాక్ష‌సుడు వ‌చ్చాడు అనే డైలాగ్ ఈ టీజ‌ర్‌లో వినిపించింది. దాన్ని బ‌ట్టి హీరో క్యారెక్ట‌రైజేష‌న్ అర్థం చేసుకోవొచ్చు. చివ‌ర్లో దున్న‌పోతుమీద హీరో కూర్చున్న షాట్.. టీజ‌ర్ కే హైలెట్. క‌థ ఎలాంటిదైనా ఆ సెట‌ప్ కొంత కొత్త‌గా క‌నిపిస్తోంది. గోపీచంద్ గెట‌ప్ కూడా బాగుంది. యాక్ష‌న్ కి పెద్ద పీట వేసిన సినిమా ఇది. ర‌వి బ‌స్రూర్ అందించిన నేప‌థ్య సంగీతం కూడా యాక్ష‌ర‌న్‌ని ఎలివేట్ చేస్తోంది. ఫిబ్ర‌వ‌రి 16న ఈ చిత్రాన్ని ప్రేక్ష‌కుల ముందుకు తీసుకొస్తున్నారు.