గోపీచంద్, శ్రీను వైట్ల కాంబినేషన్ లో వస్తున్న చిత్రం ‘విశ్వం’. టీజీ విశ్వ ప్రసాద్, వేణు దోనేపూడి నిర్మాణంలో తెరకెక్కుతున్న ఈ సినిమా టీజర్ బయటికి వచ్చింది. శ్రీను వైట్ల అంటేనే ఎంటర్టైన్మెంట్. ఈ టీజర్ లో కూడా వినోదానికే పెద్ద పీటవేశారు. ‘బంగినపల్లి మామిడి లాంటి మాపాపకి, కలెక్టర్ కాయ లాంటి కుర్రాడిని వెదికిపెట్టాలి’ అనే అంటూ నరేష్ వాయిస్ ఓవర్ తో టీజర్ ఓపెన్ అయ్యింది. నరేష్, వెన్నెల కిషోర్, సునీల్, రాహుల్ రామకృష్ణ, ప్రగతి.. నవ్వులు పంచడానికి పెద్ద గ్యాంగే వుంది. కొన్ని సింగిల్ లైనర్స్ పేలాయి. టీజర్ సెకండ్ హాఫ్ లో గోపీచంద్ యాక్షన్ లోకి దిగాడు. యాక్షన్ సీన్స్ ని స్టయిలీష్ గా తీర్చిదిద్దారు.
శ్రీవైట్ల సినిమాల్లో కామెడీ పోర్షన్ హైలెట్ గా వుంటుంది. విశ్వంలో కూడా మళ్ళీ కామెడీపైనే బలంగా ఆధారపడ్డారని టీజర్ చూస్తే అర్ధమౌతోంది. ఈ సినిమాలో ‘వెంకీ’లా ఓ ట్రైన్ సీక్వెన్ వున్న సంగతి తెలిసిందే. టీజర్ లో అందులో కొన్ని సీన్లు పడ్డాయి. గోపీచంద్ కూల్ గా కనిపిస్తూనే యాక్షన్ మోడ్ లోకి మారారు. ఆ యాక్షన్ దేనికనేది టీజర్ లో రివిల్ చేయలేదు. కావ్యథాపర్ గ్లామరస్ గా కనిపించింది. సినిమా మేకింగ్ లావిష్ గా వుంది. ఈ సినిమా శ్రీనువైట్లతో పాటు గోపీచంద్ కీ కీలకం. కొన్నాళ్ళుగా ఈ ఇద్దరికీ సరైన విజయాలు లేవు. వినోదమే ప్రధాన బలంగా వస్తున్న విశ్వం ఎలాంటి ఫలితం ఇస్తుందో చూడాలి. అక్టోబర్ 11న సినిమా రిలీజ్ కానుంది.
