మొత్తానికి జెఎఫ్ సి నివేదిక వచ్చేసింది. జెపి, ఉండవల్లి తదితరులతో పవన్ కళ్యాణ్ ఏర్పాటుచేసిన ఈ కమిటీ ఇచ్చిన నివేదిక శాస్త్రీయమైన అధ్యయనంతో గణాంకాలతో ఉండి భవిష్యత్తులో కేంద్ర రాష్ట్ర ప్రభుత్వాల మధ్య ఈ అంశంపై జరిగే ఏ చర్చ కైనా అన్ని పార్టీలకు ఉపయోగపడుతుంది అనడంలో సందేహం లేదు. అయితే మొత్తం 15 అంశాలపై అధ్యయనం చేసిన ఈ కమిటీ ఇచ్చిన రిపోర్టులో దాదాపు అన్ని అంశాల్లోనూ కేంద్రాన్ని దోషిగా నిలబెట్టినప్పటికీ, నాలుగు అంశాలలో మాత్రం రాష్ట్ర ప్రభుత్వాన్ని వేలెత్తి చూపింది .
ఈ నాలుగు అంశాలు ఏమంటే పోలవరం, అమరావతి , దుగరాజపట్నం పోర్టు , విశాఖపట్నం మెట్రో. పోలవరం విషయంలో నేరుగా రిపోర్టులో పొందుపరచనప్పటికీ నివేదిక అనంతరం పవన్ కళ్యాణ్ మాట్లాడుతూ, పోలవరం కేంద్ర ప్రభుత్వం చేపట్టాల్సిన ప్రాజెక్టు అని దాన్ని అనవసరంగా రాష్ట్ర ప్రభుత్వం తీసుకుందని , అలా తీసుకోకుండా ఉండి ఉంటే ఇప్పుడు పూర్తి కాక పోవడానికి కేంద్ర ప్రభుత్వం పూర్తిగా కారణం అయ్యేదని కానీ రాష్ట్ర ప్రభుత్వం తీసుకొని తన మీదకు నింద వచ్చేలా చేసుకుందని అభిప్రాయపడ్డారు .
అమరావతి విషయంలో మాత్రం రిపోర్టులో నేరుగా రాష్ట్ర ప్రభుత్వాన్ని వేలెత్తి చూపారు. రాష్ట్ర ప్రభుత్వం అమరావతి డిజైన్లు కూడా ఖరారు చేయలేదని , అలాగే శాశ్వత నిర్మాణాలు మొదలు కూడా పెట్టలేదు అని విమర్శించారు . అలాగే,అమరావతి కి సంబంధించిన ఖర్చుల వివరాలు కూడా రాష్ట్రప్రభుత్వం ఇవ్వలేదని నివేదికలో చేర్చారు .
ఇక దుగరాజపట్నం పోర్టు విషయంలో కూడా నివేదిక రాష్ట్ర ప్రభుత్వాన్ని తప్పుపట్టింది . కేంద్రం ప్రత్యామ్నయ ప్రాంతాన్ని చూపమని అడిగితే ఇప్పటికీ చూపించలేదని రాష్ట్ర ప్రభుత్వాన్ని తప్పుపట్టారు . వీలైనంత త్వరగా ఈ పోర్టు విషయంలో రాష్ట్ర ప్రభుత్వం చొరవ తీసుకుని ప్రత్యామ్నయ ప్రాంతాన్ని చూపాలని కమిటీ అభిప్రాయపడింది .
ఇక రాష్ట్ర ప్రభుత్వాన్ని వేలెత్తి చూపిన మరొక అంశం విశాఖపట్నం మెట్రో. ఈ మెట్రో విషయంలో రాష్ట్ర ప్రభుత్వం కేంద్రానికి ప్రపోజల్ పంపిందని , అయితే కేంద్రం దాన్ని తిరస్కరించిందని , ఆ తర్వాత మళ్లీ రాష్ట్ర ప్రభుత్వం ప్రపోజల్ పంపాల్సి ఉందని కానీ ఈ విషయంలో రాష్ట్ర ప్రభుత్వానికి స్పష్టత లేదు అని కమిటీ అభిప్రాయపడింది.
అయితే ఈ నాలుగు అంశాలు మినహాయించి మిగిలిన 11 అంశాలో కేంద్ర ప్రభుత్వాన్ని గణాంకాలతో సహా దోషిగా నిల బెట్టింది ఈ రిపోర్టు. వివరాలు తదుపరి ఆర్టికల్లో.
