కోడికత్తి శీను తల్లిదండ్రులు తన కుమారుడికి బెయిల్ ఇప్పించాలంటూ ముఖ్యమంత్రి జగన్ ఇంటి ముందు ధర్నా చేయాలని నిర్ణయించుకున్నారు. గత నాలుగేళ్లుగా కోడికత్తి శీనుకు బెయిల్ రాలేదు. వైసీపీ నేతలు ఏ మాత్రం సహకరించడం లేదు. జగన్ ను సానుభూతి తెప్పించేందుకు తాను దాడి చేశానని ఆయన అన్ని విచారణ సంస్థలకూ వాంగ్మూలం ఇచ్చాడు. ఇందులో కుట్ర ఏదైనా ఉంటే. . దేశంలో అత్యున్నత విచారణ సంస్థల్లో ఎన్ఐఏ తేల్చాల్సి ఉంది. కానీ దర్యాప్తు చేపట్టి ఏమీ తేలక సైలెంట్‌గా ఉండిపోయింది. నిందితుడు మాత్రం జైల్లోనే ఉండిపోయాడు.
కోడికత్తి శీను వల్ల వైసీపీకి జరిగిన మేలు అంతా ఇంతా కాదు. అందుకే.. ఆయనకు బెయిల్ వచ్చిందని.. డబుల్ బెడ్ రూం ఇచ్చారని.. ఎంపీటీసీ అయ్యారని ఇలా రకరకాలుగా ప్రచారం జరిగింది. కానీ వాస్తవం ఏమిటంటే ప్రభుత్వం అందరికీ ఇచ్చే పథకాలే వారికీ వస్తున్నాయి. కొత్తగా ఏమీ ఇవ్వలేదు. అదే సమయంలో తమ కుమారుడు జైల్లోనే మగ్గిపోవడం వారిని ఆందోళనకు గురి చేస్తోంది. కోడికత్తి శీను తల్లిదండ్రులు వృద్ధులయ్యారు. అందుకే చివరి రోజుల్లో తమను తమ కుమారుడు చూసుకుంటాడని వారు ఆశపడుతున్నారు.
కొద్ది రోజుల కిందట చీఫ్ జస్టిస్‌కు లేఖ రాశారు. అయినా ప్రయోజనం లేదు. వైసీపీ వాళ్లెవరూ పట్టించుకోవడం లేదు. కోడికత్తి శీను ఇంకా జైల్లోనే ఉండిపోవడానికి కారణం.. ఎన్ఐఏ విచారణ. అప్పట్లో రాష్ట్ర పోలీసులు దర్యాప్తు చేస్తూంటే.. కేంద్రం వద్ద తమకు ఉన్న పలుకుబడిని ఉపయోగించుకుని మరీ కేసును ఎన్ఐఏకు బదిలీ చేయించారు. ఫలితంగా కోడికత్తి శీను ఇరుక్కుపోయారు. ఇప్పుడు బయటకు రాలేకపోతున్నారు. వైసీపీ సాయం చేయడం లేదు. వైసీపీ వ్యవహారం ఇలాంటి విషయాల్లో పూర్తి తేడాగా ఉంది.
న్యాయమూర్తులపై దూషణలకు పాల్పడి జైలుకెళ్లిన వారికీ సాయం చేయలేదు. ప్రభుత్వంలో ఉన్నప్పుడే ఎలాంటి సాయం చేయలేదు.. ఇక ప్రతిపక్షంలో ఉంటే.. ఎవర్నీ పట్టించుకునే పరిస్థితి ఉండదు. అందుకే అందరూ బలైపోతారన్న ఆందోళన ఆ పార్టీ నేతల్లో నెమ్మదిగా పెరుగుతోంది.
