స‌ముద్ర‌ఖ‌ని.. ఈమ‌ధ్య టాలీవుడ్ లో గ‌ట్టిగా వినిపిస్తున్న పేరు. `అల వైకుంఠ‌పుర‌ములో`తో ఆయ‌న‌కు మంచి పేరు వ‌చ్చింది. ఇప్పుడు `స‌ర్కారు వారి పాట`లోనూ ఆయ‌నే విల‌న్‌. ఈ పాత్ర కోసం చాలామంది ప్ర‌ముఖుల పేర్లు ప‌రిశీలించారు. చివ‌రికి స‌ముద్ర‌ఖ‌ని ని ఎంచుకున్నారు. ఈ సినిమాలో స‌ముద్ర‌ఖ‌ని పాత్ర బాగా పండింద‌ని, స‌ర్కారు వారి పాట‌లో మేజ‌ర్ హైలెట్ అవుతుంద‌ని.. చిత్ర‌బృందం చెబుతోంది. మహేష్ కూడా స‌ముద్ర‌ఖ‌ని గురించి గొప్ప‌గానే చెబుతున్నాడు. ఆయ‌న న‌ట‌న, సెట్లో ప్ర‌వ‌ర్త‌న బాగా న‌చ్చాయ‌ని కితాబు ఇస్తున్నాడు. అంతే కాదు.. త్వ‌ర‌లోనే ఆయ‌న‌కు క‌ళ్ల‌జోళ్ల షాపు కొనిస్తాడ‌ట.
ఎందుకంటే… స‌ముద్ర‌ఖ‌నికి క‌ళ్ల‌జోళ్ల సేక‌ర‌ణ బాగా అల‌వాటు. ఎక్క‌డైనా కొత్త త‌ర‌హా క‌ళ్ల‌జోడు చూస్తే… కొనేస్తార‌ట. ‘స‌ర్కారు వారి పాట’లో మహేష్ వాడిన క‌ళ్ల‌జోళ్లు స‌ముద్ర‌ఖ‌నికి బాగా న‌చ్చాయ‌ట. అందుకే ‘మీరు వాడిన క‌ళ్ల‌జోడు ఒక‌టి ఇస్తారా.. మీ గుర్తుగా దాచుకుంటా’ అని అడిగాడ‌ట. ”నేను ఈ సినిమా చూశాను. ముఖ్యంగా స‌ముద్ర‌ఖ‌ని గారి న‌ట‌న‌కు ముగ్థుడ్ని అయ్యా. ఆయ‌న నన్నొక క‌ళ్ల‌జోడు అడిగారు. ఆయ‌న న‌ట‌న చూశాక.. ఒక‌టేంటి.. ఆయ‌న‌కోసం క‌ళ్ల‌జోళ్ల షాపే కొని ఇద్దామ‌నిపించింద”న్నాడు మహేష్.
