వ‌రుస సినిమాలతో బిజీగా ఉన్నాడు మ‌హేష్ బాబు. స్పైడ‌ర్ షూటింగ్ ద‌శ‌లో ఉండ‌గానే కొర‌టాల శివ సినిమా `భ‌ర‌త్ అను నేను` ని ప‌ట్టాలెక్కించేశాడు. ఆ వెంట‌నే మ‌హేష్‌తో సినిమా చేయ‌డానికి వంశీ పైడిప‌ల్లి సిద్ధంగా ఉన్నాడు. కొర‌టాల శివ సినిమా పూర్త‌యిన వెంట‌నే వంశీ చిత్రం సెట్స్‌పైకి వెళ్తుంది. ఈ చిత్రంలో క‌థానాయిక కోసం కొన్నాళ్లుగా వేట సాగుతోంది. ఆ ఛాన్స్ పూజా హెగ్డేకి ద‌క్కింది. అవును.. మ‌హేష్ ప‌క్క‌న క‌థానాయిక‌గా పూజాని ఎంచుకొన్నారు. ముకుంద, ఒక లైలా కోసం త‌ర‌వాత.. పూజా బాలీవుడ్ వైపు దృష్టి సారించింది. తెలుగులో అవ‌కాశాలు వ‌చ్చినా అంత‌గా ప‌ట్టించుకోలేదు. డీజేతో మ‌ళ్లీ టాలీవుడ్ ని ఆక‌ర్షించే ప‌నిలో ప‌డింది పూజా. డీజే టీజ‌ర్ వ‌చ్చిందో లేదో.. పూజాపై ఫోక‌స్ ప‌డింది. అవ‌కాశాలు వ‌రుస క‌డుతున్నాయి. అందులో భాగంగా మ‌హేష్ సినిమాలో న‌టించే ఛాన్స్ అందిపుచ్చుకొన్న‌ద‌ని స‌మాచారం. బెల్లంకొండ శ్రీ‌నివాస్ – శ్రీ‌వాస్‌ల కాంబినేష‌న్‌లో ఓ చిత్రం రూపుదిద్దుకొంటోంది. ఇందులోనూ పూజా క‌థానాయిక‌గా ఎంపిక‌య్యే అవ‌కాశాలు క‌నిపిస్తున్నాయి.
మహేష్‌కి హీరోయిన్ దొరికేసింది
