దూకుడు, ఆగ‌డు, వ‌న్ – నేనొక్క‌డినే ఇలా మ‌హేష్ బాబుతో హ్యాట్రిక్ సినిమాలు చేసి అంద‌రి దృష్టినీ ఆక‌ర్షించింది 14 రీల్స్ ఎంట‌ర్‌టైన్‌మెంట్స్ సంస్థ‌. దూకుడు అప్ప‌టి వ‌ర‌కూ ఉన్న రికార్డుల్ని తిర‌గ‌రాస్తే – ఆగ‌డు బాగా నిరాశ పరిచింది. వ‌న్ కూడా ఆర్థికంగా న‌ష్టాన్ని మిగిల్చింది. ఆ త‌ర‌వాత 14 రీల్స్‌కి అన్నీ ఎదురు దెబ్బ‌లే. ఇటీవ‌ల ‘లై’ కూడా నిర్మాత‌ల్ని దారుణంగా దెబ్బేసింది. దాంతో స్టార్ హీరోల‌తో సినిమా అన‌గానే 14 రీల్స్ జంకుతోంది. అయితే.. ఈసారి మ‌హేష్ 14 రీల్స్‌కి కాల్షీట్లు ఇచ్చిన‌ట్టు తెలుస్తోంది. మ‌హేష్ తో ఓ సినిమా చేయ‌డానికి 14 రీల్స్ ఒప్పందం కుదుర్చుకొంద‌ని టాలీవుడ్ టాక్‌. ఇప్ప‌టికే 14 రీల్స్ మ‌హేష్ కోసం క‌థ‌ల్ని సిద్ధం చేసే ప‌నిలో ప‌డింది. యువ ద‌ర్శ‌కులు చెప్పే క‌థ‌ల‌తో పాటు, స్టార్ ద‌ర్శ‌కుల స్క్రిప్టుల్ని కూడా మ‌హేష్‌కి వినిపిస్తున్నార్ట‌. ఆగ‌డు, వ‌న్ న‌ష్టాల్ని భ‌ర్తీ చేస్తాన‌ని మ‌హేష్ ఇది వ‌ర‌కే ఈ నిర్మాత‌ల‌కు మాట ఇచ్చాడు. అందులో భాగంగానే ఈ సినిమాని ఓకే చేసిన‌ట్టు తెలుస్తోంది. 14 రీల్స్‌తో చేసే తాజా చిత్రానికి పారితోషికం తీసుకోకుండా… లాభాల్లో వాటా పొందే అవ‌కాశాలు క‌నిపిస్తున్నాయి. మ‌హేష్ – కొర‌టాల శివ సినిమా పూర్త‌యిన త‌ర‌వాత‌, వంశీ పైడి ప‌ల్లి సినిమా మొద‌ల‌వుతుంది. ఆ త‌ర‌వాతే 14 రీల్స్‌లో సినిమా ఉంటుంది.