వ‌రుణ్ తేజ్ – క‌రుణ కుమార్ కాంబినేష‌న్‌లో రూపుదిద్దుకొంటున్న సినిమా `మ‌ట్కా`. వ‌రుణ్ కెరీర్‌లోనే భారీ బ‌డ్జెట్ తో రూపుదిద్దుకొంటున్న చిత్ర‌మిది. అయితే ప్రీ రిలీజ్ బిజినెస్ కూడా అదే రేంజ్ లో జ‌రిగే అవ‌కాశాలు క‌నిపిస్తున్నాయి. ఇప్ప‌టికే ఆడియో రైట్స్ మంచి రేటుకు అమ్ముడుపోయాయి. రూ.3.6 కోట్ల‌కు ఆదిత్య మ్యూజిక్ ఈ హ‌క్కుల్ని సొంతం చేసుకొంది. వ‌రుణ్ కెరీర్‌లో ఇదే రికార్డు ధ‌ర. క‌రుణ కుమార్‌కి మంచి మ్యూజిక్ సెన్స్ వుంది. త‌న తొలి సినిమా `ప‌లాస`లో న‌కిలీసు గొలుసు పాట ఎంత పెద్ద హిట్ అయ్యిందో తెలిసిందే. కేవ‌లం ఆ పాట‌తోనే `ప‌లాస` బ‌డ్జెట్ మొత్తం వెన‌క్కి రాబ‌ట్టుకోగ‌లిగారు. `శ్రీ‌దేవి సోడా సెంట‌ర్‌`లోనూ మంచి పాట‌లే ఇచ్చాడు క‌రుణ కుమార్. `మ‌ట్కా`కు జీవీ ప్ర‌కాష్ కుమార్ సంగీతాన్ని అందిస్తున్నాడు. అది కూడా ప్ల‌స్ పాయింటే. జీవీ ఆల్బ‌మ్ కంటే క‌చ్చితంగా రెండు మంచి పాట‌లైనా వ‌స్తాయి. ఆ భ‌రోసాతోనే ఆదిత్య మ్యూజిక్ ఈ సినిమా రైట్స్‌ని ద‌క్కించుకొంది.
1958 – 1982 మ‌ధ్య జ‌రిగిన పిరియాడిక‌ల్ డ్రామా ఇది. వ‌రుణ్ లుక్ కొత్త‌గా అనిపిస్తోంది. మీనాక్షి చౌద‌రి, నౌరా ఫ‌తేహీ క‌థానాయిక‌లుగా న‌టిస్తున్నారు. న‌వీన్ చంద్ర కీల‌క పాత్ర‌ధారి. విశాఖ‌ప‌ట్నంలో కొంత‌మేర చిత్రీక‌ర‌ణ జ‌రిపారు. త్వ‌ర‌లోనే ఓ టీజ‌ర్ విడుద‌ల చేసే అవ‌కాశం ఉంది.
