హైదరాబాద్: చిరంజీవి 150వ సినిమా వివరాలు కొన్నింటిని ఆ సినిమా నిర్మిస్తున్న రాంచరణ్ బయటపెట్టారు. నిర్మాణసంస్థ పేరు తమ ఇంటిపేరైన ‘కొణిదెల’తో ఉంటుందని తెలిపారు. లోగోలో ఆంజనేయుడి బొమ్మ ఉంటుందని చెప్పారు. చిరంజీవి స్క్రిప్ట్ ఖరారు చేయగానే షూటింగ్ ప్రారంభిస్తామని, ఆరునెలల్లో పూర్తి చేస్తామని తెలిపారు. 2016 వేసవిలో విడుదల చేయాలన్నది తన కోరిక అని చెప్పారు. నలుగురు టాప్ డైరెక్టర్‌లు ఈ చిత్రాన్ని చేయటానికి ముందుకొచ్చారని తెలిపారు. తానుకూడా ఒక పాటలో తండ్రితోబాటు కాలు కదుపుతానని, సీన్ ఏమీ చేయబోనని చెప్పారు. పవన్, అల్లు అర్జున్… మెగా ఫ్యామిలీ హీరోలందరూకూడా ఈ చిత్రంలో కనిపిస్తారని చరణ్ అన్నారు.
మరోవైపు 150వ సినిమాకోసం సల్మాన్ ఖాన్ ‘బజరంగీ భాయ్‌జాన్’ చిత్రం రీమేక్ రైట్స్ తీసుకుంటున్నారని, తమిళ చిత్రం ‘కత్తి’ రైట్స్ కొంటున్నారని వినబడుతున్న ఊహాగానాలపై స్పందించటానికి చరణ్ నిరాకరించారు. బాలీవుడ్‌ గురించి మాట్లాడుతూ, మొదటి ప్రయత్నంలో తనను తిరస్కరించిన మాట నిజమేనని, అయితే త్వరలో మరో చిత్రం చేస్తానని చరణ్ చెప్పుకొచ్చారు.
