డిస్నీ స్టూడియోస్ ప్ర‌తిష్టాత్మ‌కంగా తెర‌కెక్కించిన యానిమేష‌న్ చిత్రం ‘ముఫాసా’. ఈ చిత్రానికి మ‌హేష్ బాబు డ‌బ్బింగ్ చెప్ప‌డంతో తెలుగు ప్రేక్ష‌కుల దృష్టిని ఆక‌ర్షించింది. ‘ముఫాసా’ పాత్ర‌కు మ‌హేష్ గాత్ర‌దానం చేయ‌డంతో ‘ముఫాసా’ తెలుగు వెర్ష‌న్ పై ఫోక‌స్ ప‌డింది. ఇప్పుడు ట్రైల‌ర్ ని తెలుగులో విడుద‌ల చేశారు. మ‌హేష్ గొంతులో ఓ మ్యాజిక్ ఉంటుంది. కొన్ని డైలాగులు మ‌హేష్ గొంతు వ‌ల్ల మెరుస్తాయి. ఈ ట్రైల‌ర్‌లో ఆ మ్యాజిక్ కనిపించింది. ముఖ్యంగా ‘ఇందాకేదో చెప్పావే..’ అన్న‌చోట ‘మాస్’ మ‌హేష్ క‌నిపించాడు. ట్రైల‌ర్ లో బ్ర‌హ్మానందం, అలీ గొంతులు కూడా వినిపించాయి.

హాలీవుడ్ చిత్రాలు తెలుగు డ‌బ్బింగ్ లో చూస్తుంటే మ‌న‌దైన ఎట‌కారం, చ‌మ‌త్కారాలు క‌నిపిస్తాయి. ‘ముసాఫా’ అందుకు మిన‌హాయింపు కాదు. యానిమేటెడ్ పాత్ర‌లు చిన్న పిల్ల‌ల్ని థియేట‌ర్ల‌కు ర‌ప్పించే అవ‌కాశం ఉంది. మ‌హేష్ పాత్ర కూడా తోడ‌య్యింది కాబ‌ట్టి ఆయ‌న అభిమానులు ఈ సినిమాపై దృష్టి సారించొచ్చు. 2 నిమిషాల 34 సెక‌న్ల ఈ ట్రైల‌ర్ హాలీవుడ్ చిత్రాల్ని ఇష్ట‌ప‌డేవాళ్ల‌ని ఆక‌ర్షిస్తుంద‌న‌డంలో ఎలాంటి సందేహం లేదు. డిసెంబ‌రు 20న ఈ చిత్రం ప్ర‌పంచ వ్యాప్తంగా విడుద‌ల కానుంది.