చేతినిండా సినిమాలతో బిజీగా ఉన్నాడు ప్రభాస్. అన్నీ పాన్ ఇండియా సినిమాలే. కేజీయఫ్‌’ డైరెక్టర్‌ ప్రశాంత్‌నీల్‌తో ‘సలార్‌’ సినిమా చేస్తున్నారు. అలాగే నాగ్‌ అశ్విన్‌తో ‘ప్రాజెక్ట్‌ కే’ పేరుతో ఓ సినిమా చేస్తున్నారు. ఇక వీటితో పాటు ఓం రౌత్‌ దర్శకత్వంలో ‘ఆదిపురుష్‌’ లో నటిస్తున్నారు.ఇప్పుడు మరో బాలీవుడ్ దర్శకుడితో ప్రభాస్ సినిమా చేయబోతున్నారు . బాలీవుడ్ డైరెక్టర్‌ సిద్ధార్థ్‌ ఆనంద్‌ తో ప్రభాస్ తర్వాత చిత్రం ఉండనుందని గత కొంతకాలంగా వార్తలు వస్తోన్న విషయం తెలిసిందే. మైత్రీ మూవీ మేకర్స్‌ తాజాగా ఈ విషయంపై ప్రకటన చేసింది.
ఈ సంక్రాంతికి టాలీవుడ్‌ అగ్ర హీరోలు నటించిన రెండు సినిమాలు విడుదల చేసిన మైత్రీ మూవీస్‌ సంస్థ.. ప్రభాస్ సినిమాకు సంబంధించి క్లారిటీ ఇచ్చింది. సిద్ధార్థ ఆనంద్‌ దర్శకత్వంలో ప్రభాస్ సినిమా ఉంటుందని ఈ సంస్థ ప్రతినిధులు ఖరారు చేశారు. ఈ చిత్రానికి సంబంధించిన వివరాలు త్వరలోనే అధికారికంగా వెల్లడిస్తామని తెలిపారు. ప్రస్తుతం సిద్ధార్థ్‌ ఆనంద్‌ రూపొందించిన ‘పఠాన్‌’ సినిమా 25న ప్రేక్షకుల ముందుకు రానుంది. ఈ సినిమా విజయం సాధిస్తే కనుక వెంటనే ప్రభాస్ సినిమాపై కూడా ప్రకటన వచ్చేసే అవకాశం వుంది.
