నంద‌మూరి వార‌సుడు మోక్ష‌జ్ఞ ఎంట్రీ కోసం అభిమానులు ఎప్ప‌టి నుంచో వెయిటింగ్. ‘ఇదిగో.. అదుగో’ అంటూ బాల‌య్య కూడా వారిని ఊరిస్తూ వ‌చ్చాడు. అయితే… మోక్ష‌జ్ఞ లుక్ వాళ్ల‌ని క‌ల‌వ‌ర‌పెట్టేది. కాస్త బొద్దుగా, ‘హీరో’ అనే మెటీరియ‌ల్ కి కాస్త దూరంగా క‌నిపించేవాడు. అస‌లు మోక్ష‌జ్ఞ‌కి సినిమాల్లోకి వ‌చ్చే ఆస‌క్తి ఉందా, లేదా? అనే అనుమాన‌మూ ఉండేది. కానీ ఇప్పుడు స‌రికొత్త మోక్ష‌జ్ఞ లుక్ బ‌య‌ట‌కు వచ్చింది. త‌న‌ని చూస్తే… ఇంత స‌డ‌న్ గా అంత ఛేంజ్ ఏమిటి? అంటూ ఆశ్చర్యం వేస్తోంది. మేకొవ‌ర్ అంటే ఇదీ.. అనాల‌నిపిస్తోంది. అయితే అందుకు మోక్ష‌జ్ఞ చాలాకాలంగా చ‌మ‌టోడుస్తున్నాడు. ఇప్పుడున్న పోటీలో, త‌ట్టుకోవాలంటే.. నంద‌మూరి లెగ‌స్సీని కాపాడుకొంటూ, ముందుకు న‌డిపించాలంటే ఈ మాత్రం క‌ష్ట‌ప‌డ‌క త‌ప్ప‌ద‌ని అర్థ‌మైంది. ప్ర‌స్తుతం వైజాగ్ లోని స‌త్యానంద్ ఇనిస్టిట్యూట్‌లో న‌ట‌న‌కు సంబంధించిన త‌ర్ఫీదు పొందుతున్నాడు. అక్క‌డే ఓ ఫిజిక‌ల్ ట్రైన‌ర్ మోక్ష‌జ్ఞ‌ని తీర్చిదిద్దుతున్నాడు. అందుకే ఈ మేకొవ‌ర్ సాధ్య‌మైంది. స‌త్యానంద్ నుంచి వ‌చ్చిన చాలామంది టాప్ స్టార్లుగా మారారు. ముఖ్యంగా వార‌స‌త్వ హీరోల్ని ఆయ‌న స్టార్లుగా తీర్చిదిద్దారు. ప‌వ‌న్ క‌ల్యాణ్‌, ప్ర‌భాస్‌.. ఈ జాబితాలో చేరే హీరోలే. ఇప్పుడు మోక్ష‌జ్ఞ కూడా అక్క‌డి నుంచే వ‌స్తున్నాడు కాబ‌ట్టి.. ఫ్యాన్స్ లో మ‌రింత భ‌రోసా పెరిగింది.

మోక్ష‌జ్ఞ కోసం ఇప్ప‌టికే ప‌లు స్క్రిప్టులు రెడీగా ఉన్నాయి. ప్ర‌శాంత్ వ‌ర్మ ఇప్ప‌టికే బాల‌య్య‌కు ఓ క‌థ చెప్పి లైన్‌లో పెట్టాడు. బోయ‌పాటి శ్రీ‌నుపై కూడా బాల‌య్య‌కు గురి ఉంది. అయితే బోయ‌పాటి శ్రీ‌ను సినిమా అయితే మాస్‌, యాక్ష‌న్ ఆశిస్తారు. తొలి సినిమాతోనే మోక్ష‌జ్ఞ‌పై అంత ఒత్తిడి తీసుకురావ‌డం బాల‌య్య‌కు ఇష్టం లేదు. అందుకే మోక్షు ఎంట్రీ ఓ క్లీన్ ఫ్యామిలీ ఎంట‌ర్‌టైన‌ర్‌తో అయితే బాగుంటుంద‌ని భావిస్తున్నాడు. ఏది ఏమైనా ఈ యేడాది చివ‌రి నాటికి మోక్షు ఎంట్రీ ఖాయం.